Green Capital Kazakhstan жобасына жапониялық серіктес қосылады
Food Ventures пен DENSO Group жылыжай кешенін кеңейтуге 50 млн еуро инвестиция салады
Ақтөбе облысындағы Green Capital Kazakhstan жылыжай кешенін кеңейтуге шамамен 50 млн еуро инвестиция салынады. Бұл жобаның серіктесі жапониялық DENSO Group болады, деп хабарлайды Kapital.kz іскерлік ақпарат орталығы ауыл шаруашылығы министрлігінің баспасөз қызметіне сілтеме жасап.
«Green Capital Kazakhstan» ЖШС-нің қолданыстағы жылыжай кешені 2017 жылдан бері нидерландтық Food Ventures компаниясы мен Қазақстан-Венгрия тікелей инвестициялар қорының қатысуымен жұмыс істеп келеді. Жоба аясында жылына 12 мың тоннаға дейін жеміс-көкөніс өнімін өндіріп, оны ішкі нарықта өткізу және көрші елдерге экспорттау көзделген. Бүгінде 10 гектар жылыжай пайдалануға беріліп, 170-тен астам жұмыс орны құрылған.
Жобаның жаңа стратегиялық серіктесі жылдық айналымы шамамен 48 млрд долларды құрайтын жапониялық DENSO Corporation технологиялық концерні болды. Компания 2023 жылы жылыжай кешендері мен агроөндірісті автоматтандыру саласындағы әлемдік көшбасшылардың бірі саналатын Certhon компаниясын сатып алды. Бұл Қазақстанда қорғалған топырақ жағдайында ауыл шаруашылығы өндірісіне арналған озық технологиялық шешімдерді енгізуге мүмкіндік береді.
Кездесу барысында Ауыл шаруашылығы вице-министрі Ермек Кенжеханұлы шетелдік серіктестерге Қазақстандағы инвестициялық қызметін кеңейту туралы шешімі үшін алғыс айтып, азық-түлік қауіпсіздігін қамтамасыз ету мемлекеттік саясаттың негізгі басымдықтарының бірі екенін, ал жылыжай өндірісін дамыту стратегиялық маңызға ие екенін атап өтті.
«Қолданыстағы жылыжай кешенін кеңейту отандық жаңа піскен көкөніс өндірісінің көлемін ұлғайтуға, өсімдіктерді өсірудің, микроклиматты басқарудың және энергия үнемдеудің заманауи технологияларын енгізуге, сондай-ақ ауылдық аумақтардың одан әрі дамуына мүмкіндік береді. Ең бастысы, жоба аясында шамамен 200 жаңа жұмыс орнын ашу жоспарланып отыр, ал инвестициялардың жалпы көлемі шамамен 50 млн еуроны құрайды», – деді вице-министр.
Инвесторлардың мәліметінше, жоба әрқайсысы 7 гектар жылыжайдан тұратын екі кезеңмен іске асырылады. Бірінші кезеңді қаржыландыру көлемі қажетті инженерлік және энергетикалық инфрақұрылымды құру шығындарын қоса есептегенде 20–25 млн еуроға бағаланып отыр. Жаңа жылыжай кешендерінде ауыл шаруашылығы дақылдарын өсірудің, микроклиматты автоматты басқарудың және энергия үнемдеудің заманауи нидерландтық және жапониялық технологиялары қолданылады.
Қазіргі уақытта Қазақстанның Ауыл шаруашылығы министрлігі инвесторлармен бірлесіп жобаны инфрақұрылыммен қамтамасыз ету, қаржыландыру тарту және мемлекеттік қолдаудың қолданыстағы тетіктерін пайдалану мәселелерін белсенді түрде пысықтап жатыр.
«Food Ventures пен DENSO Group компанияларының озық технологиялық шешімдерін пайдалану Қазақстанның жылыжай саласының одан әрі дамуына, оның бәсекеге қабілеттілігін арттыруға және елдің азық-түлік қауіпсіздігін нығайтуға ықпал етеді деп сенемін. Өз тарапымыздан инвестициялық жобаны жан-жақты сүйемелдеуге дайынбыз», – деп түйіндеді Ермек Кенжеханұлы.
Бұған дейін Маңғыстау облысында көкөніс сақтау қоймасы бар жылыжай кешені салынатыны хабарланған болатын. Түркістан облысының Келес ауданында жылына 25 мың тоннаға дейін қызанақ өндіретін Ecoculture-Eurasia өнеркәсіптік жылыжай кешенін салу жоспарланған. Сондай-ақ Fabe Polska компаниясымен Шымкентте жылына 38 мың тонна қызанақ өндіретін заманауи жылыжай кешенін салу жөнінде инвестициялық келісімге қол қойылды. Ал 2025 жылдың желтоқсан айының соңында Түркістан облысында аумағы шамамен 52 гектар болатын Қазақстандағы ең ірі «Экокультура Евразия» жылыжай кешені іске қосылғаны хабарланған еді.
Ұлттық статистика бюросының мәліметінше, Қазақстандағы барлық жылыжайлардың 62%-дан астамы бір өңірде – Түркістан облысында шоғырланған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
