Тимур Құлыбаевтың холдингтік компаниясы KASE-тен кетеді
Joint Resources ерікті делистинг жүргізеді
Кәсіпкер Тимур Құлыбаевтың бақылауындағы Joint Resources холдингтік инвестициялық компаниясы Қазақстан қор биржасынан (KASE) кетеді, деп хабарлайды Kapital.kz іскерлік ақпарат орталығы.
«Joint Resources компаниясының жалғыз акционері 2026 жылғы 29 маусымда KASE-нің ресми тізімінен жай акцияларды ерікті түрде делистингтен шығару туралы шешім қабылдады», – делінген компанияның 30 маусымда биржа сайтында жарияланған хабарламасында.
Айта кетейік, мұндай шешімнің себебі көрсетілмеген.
Joint Resources АҚ – активтерді басқарумен және тау-кен өнеркәсібі, мұнай өндіру, энергетика салаларындағы инвестициялармен айналысатын қазақстандық холдингтік инвестициялық компания.
KASE-нің 2026 жылғы 1 сәуірдегі дерегіне сәйкес, компанияның жалғыз акционері – кәсіпкер Тимур Құлыбаев.
Joint Resources портфелінде бірнеше компания бар.
«Кристалл Менеджмент» АҚ – Joint Resources бұл компания акцияларының 51%-ына иелік етеді, алайда ол холдингтің еншілес құрылымы болып саналмайды. Компания Қазақстанда тіркелген және энергиямен жабдықтаушы кәсіпорындарға электр энергиясын өндіру және сатумен айналысады. 2020 жылдың қарашасында холдинг «Кристалл Менеджмент» акцияларын сенімгерлік басқаруға берген.
«Exploration Production Crystal Management» ЖШС – Joint Resources компаниядағы үлестің 51%-ына иелік етеді. Бұл серіктестік те холдингтің еншілес компаниясы емес. Ол 2018 жылы Қазақстанда құрылған. Холдинг компаниядағы 51% үлесті 2020 жылдың шілдесінде сатып алған. Ал 2021 жылы бұл үлес сенімгерлік басқаруға берілді.
«Premier Development Company» ЖШС – Joint Resources компаниядағы 50% үлеске ие. Серіктестік Қазақстанда тіркелген. Оған Шөптікөл кен орнында қоңыр көмір өндіретін «Майкүбен-Вест» ЖШС тиесілі. 2019 жылы Joint Resources Premier Development Company-дегі үлесін сенімгерлік басқаруға тапсырды. Осы кезден бастап ол холдингтің еншілес компаниясы болып саналмайды.
«ГЭС-Ақсайбұлақ» ЖШС – Joint Resources компаниядағы 51% үлеске ие. Серіктестік 2020 жылы Қазақстанда тіркелген. Ол газтурбиналық электр станциясын пайдаланумен, электр энергиясын өндірумен және сатумен айналысады. 2021 жылдың қаңтарында компаниядағы 51% үлес сенімгерлік басқаруға берілді. Осыдан кейін ол Joint Resources-тің еншілес компаниясы мәртебесінен айырылды.
«Каспий мұнай» АҚ – Joint Resources компанияның 100% акциясына иелік етеді. Акционерлік қоғам Атырау облысы Жылыой ауданындағы Айранкөл кен орнында мұнай өндірумен айналысады. Joint Resources бұл компанияны 2020 жылы сатып алып, кейін сенімгерлік басқаруға берген. Топ бұл активті еншілес компания ретінде жіктемейді.
«Каспий» ЖШС – меншігіндегі коммерциялық жылжымайтын мүлікті жалға беру және басқару қызметімен айналысады. Топтың 2025 жылғы қаржылық есебіне сәйкес, бұл актив 2024 жылдың шілдесінде 1,9 млрд теңгеге сатып алынған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
