«Байтақ» партиясы Құрылтай сайлауына 51 кандидат ұсынды
Тізімге экологтар, геологтар, заңгерлер, кәсіпкерлер, дәрігерлер, мұғалімдер мен инженерлер енді
Қазақстанның «Байтақ» жасылдар партиясының делегаттары бейсенбі күні өткен съезде Құрылтай депутаттығына ұсынылатын 51 кандидаттың тізімін бекітті, деп хабарлайды Kapital.kz іскерлік ақпарат орталығы Интерфакс-Қазақстан агенттігіне сілтеме жасап.
Шешім бірауыздан қабылданды. Кандидаттар тізіміне «Байтақ» партиясының төрағасы Азаматхан Әміртай және партияның өзге де өкілдері – экологтар, геологтар, заңгерлер, кәсіпкерлер, дәрігерлер, мұғалімдер мен инженерлер кірді.
Бұған дейін Respublica, «Ақ жол» демократиялық партиясы, «Ауыл» халықтық-демократиялық патриоттық партиясы, Қазақстан халық партиясы (ҚХП) және Жалпыұлттық социал-демократиялық партиясы (ЖСДП) да сайлауға қатысатынын мәлімдеп, тиісінше 76, 63, 69, 72 және 33 кандидаттан тұратын тізімдерін ұсынған болатын.
Қазақстандағы сайлау 23 тамызға белгіленген. Заң шығару билігін жүзеге асыратын жоғары өкілді орган – Құрылтай алғаш рет сайланады. Бұған дейін елде Мәжіліс пен Сенаттан тұратын қос палаталы Парламент жұмыс істеді.
Құрылтай бірыңғай жалпыұлттық сайлау округі бойынша пропорционалды өкілдік жүйесі негізінде сайланатын 145 депутаттан тұрады. Яғни сайлаушылар партиялық тізімдерге дауыс береді. Құрылтай депутаттары жалпыға бірдей, тең және төте сайлау құқығы негізінде жасырын дауыс беру арқылы бес жыл мерзімге сайланады. Құрылтайдан орын алу үшін партиялар бірыңғай жалпыұлттық сайлау округі бойынша берілген дауыстардың кемінде 5%-ын жинауы қажет.
Қазіргі таңда Қазақстанда жеті саяси партия тіркелген. Олар: жақында құрылған және маусым айының ортасында қайта ұйымдастыру арқылы биліктегі Amanat партиясы қосылған «Әділет» партиясы, «Ақ жол» демократиялық партиясы, Қазақстан халық партиясы (ҚХП), «Ауыл» халықтық-демократиялық патриоттық партиясы, Жалпыұлттық социал-демократиялық партиясы (ЖСДП), «Байтақ» жасылдар партиясы және Respublica партиясы. Бұрынғы қос палаталы Парламентте алты партияның өкілдері болған.
Еске салайық, 2026 жылғы 15 наурызда Қазақстанда жалпыхалықтық референдум өтіп, жаңа Конституция қабылданды. Елдің жаңа Ата заңы 1 шілдеден бастап ресми түрде күшіне енді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
