• Басты бет
• Мемлекет
• Қасым-Жомарт Тоқаев қазақстандықтарды жаңа Конституцияның күшіне енуімен құттықтады

Қасым-Жомарт Тоқаев қазақстандықтарды жаңа Конституцияның күшіне енуімен құттықтады

Президенттің айтуынша, бүгіннен бастап елде саяси жүйені түбегейлі жаңғырту кезеңі басталады

Мемлекет басшысы Қасым-Жомарт Тоқаев Қазақстанның жаңа Конституциясының күшіне енуіне байланысты қазақстандықтарға үндеу жасады, деп хабарлайды Kapital.kz іскерлік ақпарат орталығы Ақорданың баспасөз қызметіне сілтеме жасап.

«Құрметті отандастар! Баршаңызды еліміздің жаңа Конституциясының күшіне енуі сияқты шын мәнінде тарихи оқиғамен шын жүректен құттықтаймын! Бүгін егемен Қазақстан тарихындағы жаңа дәуір басталады. Біз тұрақты даму, саяси және экономикалық реформалар, ауқымды жаңғыру жолына қадам басып отырмыз. Бұл күн саяси жүйені түбегейлі қайта құрудың, мемлекет пен азаматтық қоғамның негізгі институттарын жаңғыртудың бастауы болады», – деді президент.

Оның айтуынша, 15 наурызда өткен жалпыхалықтық референдумда Қазақстан халқы мемлекеттің алдағы ондаған жылдағы даму бағытын айқындаған тарихи таңдау жасады. Президент бұл шешім ел шежіресінде шынайы патриотизм мен миллиондаған азаматтың жоғары азаматтық жауапкершілігінің жарқын үлгісі ретінде мәңгі сақталатынын атап өтті.

«Конституция күні енді «Наурызнама» онкүндігінің басталуымен тұспа-тұс келуі – ерекше мәнге ие. Бұл айтулы күн көктемгі жаңарудың ғасырлар бойғы дәстүрін жаңа Ата заңның азаматтық ынтымаққа, озық білімге және Отан игілігі жолындағы адал еңбекке негізделген қағидаттарымен үйлестіреді. Жалпы халықтың еркімен қабылданған Конституцияның берік құқықтық іргетасына сүйене отырып, біз алға қойған барлық мақсатымызға қол жеткізіп, қоғамда Заң мен Тәртіп, Еңбекқорлық пен Прогресс, Тазалық пен Табиғатқа жанашырлық құндылықтарын орнықтыратынымызға сенімдімін», – деді Қасым-Жомарт Тоқаев.

«Жалпыұлттық бірлігімізді мызғымас тұғырға айналдыра отырып, біз әлемдік өркениеттің биіктерін бағындырып, әрбір азаматқа тең мүмкіндік пен жан-жақты даму жолын ашатын Әділетті Қазақстанды құрамыз! Жоспарланған мақсаттардың толық жүзеге асып, Отанымыздың гүлденуіне жол ашатынына сенемін. Жасасын Қазақстан Республикасы! Жасасын халқымыз!» – деді мемлекет басшысы.

Еске салайық, 2026 жылғы 15 наурызда Қазақстанда жалпыхалықтық референдум өтіп, жаңа Конституция қабылданды. Жаңартылған Ата заң 1 шілдеден бастап ресми түрде күшіне енді. Оған сәйкес Қазақстан Парламенті бір палаталы болады. Оның құрамынан Сенат шығарылып, жаңа заң шығарушы орган Құрылтай деп аталады. Сонымен қатар Халық Кеңесі құрылады. Оның құрамына 126 адам енеді.

Бұған дейін Мәулен Әшімбаев Құрылтайдың құрылуы институционалдық реформа ғана емес, саясатқа жаңа буын басқарушылардың келуіне мүмкіндік беретін маңызды қадам болатынын айтқан еді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз