Қасым-Жомарт Тоқаев елдің технологиялық егемендігінің маңызын айтты
Президент ғылым мен жоғары білім беру жүйесін дамытуға басымдық беруді тапсырды
XXI ғасырда мемлекеттің табысты болуы үшін табиғи ресурстар мен халық санының өзі жеткіліксіз. Инфляцияға ұшырамайтын жалғыз капитал – адами әлеуеттің сапасы. Бұл туралы президент Қасым-Жомарт Тоқаев парламент палаталарының бірлескен отырысында айтты, деп хабарлайды Kapital.kz іскерлік ақпарат орталығы.
Мемлекет басшысының айтуынша, қазіргі жағдайда елдің технологиялық егемендігін одан әрі нығайту үшін ғылым мен жоғары білім беру жүйесін дамытуға ерекше назар аудару қажет.
«Біз отандық жоғары оқу орындарын жаңғыртуға ерекше көңіл бөліп, жетекші шетелдік университеттердің филиалдарын белсенді түрде ашып жатырмыз. Сіздер қабылдаған «Ғылым және технологиялық саясат туралы» жаңа заң ғылыми инфрақұрылымның едәуір жақсаруына ықпал етіп, жас ғалымдар үшін жаңа мүмкіндіктер ашты. Жалпы, алдымызда ғылымның деңгейі мен тиімділігін барынша арттыру міндеті тұр», – деді Қасым-Жомарт Тоқаев.
Президент соңғы үш жылда елімізде 584 заманауи мектеп салынғанын, олардың әрбір үшіншісі «Келешек мектептері» инновациялық жобасы аясында бой көтергенін айтты. Биыл тағы 84 мектеп пайдалануға беріледі, оның жартысынан көбі ауылдық жерлерде орналасады.
Мемлекет басшысы әлеуметтік саланың стратегиялық бағыт ретінде қарастырылатынын және азаматтардың жан-жақты дамуына арналған барлық негізгі бағыттарға қомақты қаражат бөлінетінін атап өтті. Әсіресе ғылым мен білімге, мәдениет пен денсаулық сақтауға, спортқа және әлеуметтік қолдау жүйесіне басымдық беріліп отыр. Биыл осы бағыттарға 19 трлн теңгеден астам қаржы бөлу жоспарланған. Бұл – мемлекеттік бюджеттің жартысынан астамы.
«Қазақстан әлемдегі ауқымды әрі дәйекті әлеуметтік саясат жүргізіп отырған санаулы мемлекеттердің бірі болып қала береді. Әлеуметтік маңызы бар бастамаларды ілгерілету мен қоғамдағы әділеттілік қағидаттарын орнықтыруда Парламенттің рөлі зор. Алайда шынайы әділеттілік қоғамдық игіліктерді теңдей бөлісу емес. Ол – әрбір азаматқа тең мүмкіндік жасауға бағытталған мұқият теңгерілген әрі барынша тиімді жүйе. Мұндай тәсілдің негізінде заң алдында бәрінің теңдігі жатыр», – деді президент.
Оның айтуынша, «Заңсыз иемденілген активтерді мемлекетке қайтару туралы» заңның қабылдануы осының жарқын мысалы болды. Соның нәтижесінде елге 1 трлн теңгеден астам қаражат қайтарылып, бұл қаржыға 450 әлеуметтік және коммуналдық нысан салынды.
«Арнайы конституциялық норманың арқасында біз өңірде алғаш болып табиғи байлықты азаматтардың нақты бастапқы капиталына айналдырдық. «Ұлттық қор – балаларға» бағдарламасы өзінің жоғары тиімділігін дәлелдеді: үш жыл ішінде 6,5 млн жас қазақстандықтың шотына 2,3 млрд доллар аударылды. Бұл жүйелі қолдаудың заңды жалғасы ретінде «Келешек» жинақтау жүйесі және халықаралық олимпиадалардың жеңімпаздарына арналған кешенді қолдау шаралары іске қосылды. Біз болашаққа инвестиция салуды дәл осылай түсінеміз. Еуразия құрлығындағы қай мемлекет әлеуметтік қажеттіліктерге осыншалықты қомақты қаражат бөліп отыр? Жауабы, меніңше, айқын», – деді Қасым-Жомарт Тоқаев.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
