Президент реформалардың басты мақсатын атады
Қасым-Жомарт Тоқаевтың айтуынша, құрылымдық формат өзгереді, бірақ жалпыұлттық бірліктің мәні өзгермейді
Тиімді жұмыс істейтін қоғамдық институттарсыз озық әрі Әділетті мемлекет құру мүмкін емес. Бұл туралы президент Қасым-Жомарт Тоқаев Парламент палаталарының бірлескен отырысында айтты, деп хабарлайды Kapital.kz іскерлік ақпарат орталығы.
Мемлекет басшысы Қазақстан Халық кеңесі мәслихаттардың, қоғамдық кеңестердің, сарапшылық алаңдардың және азаматтық қоғам ұйымдарының өкілдерін біріктіретінін түсіндірді.
«Халық кеңесі бұған дейін Қазақстан халқы Ассамблеясының құзыретінде болған функцияларды да өзіне алады. Осылайша, құрылымдық формат өзгереді, бірақ ішкі саясатымыздың негізгі бағыты саналатын жалпыұлттық бірліктің мәні еш өзгермейді. Халық кеңесі – еліміздің тарихындағы конституциялық деңгейдегі алғашқы диалог алаңы, Қазақстанның бірегей әралуандығының символы», – деді президент.
Қасым-Жомарт Тоқаевтың айтуынша, бұған дейін бөлек жұмыс істеген құрылымдар заң шығару бастамасы құқығына ие Жоғары консультативтік органға біріктіріледі.
«Бұл бүкіл халықтың үні мемлекеттік саясаттың ажырамас бөлігіне айналады деген сөз. Реформалардың ең құнды нәтижесі – азаматтардың аса маңызды мемлекеттік шешімдерді қабылдау үдерісіне қатысуы. Отыз жылға жуық қолданылмай келген халықтың тікелей ерік білдіру тетігі нақты саяси тәжірибеге айналды. 2022 жылдан бері ел үшін тағдырлы мәселелер бойынша үш республикалық референдум өткізілді. Менің ұстанымым өзгермейді: елдегі өзгерістердің бастамашысы халық болуы тиіс. Бірақ нақты бастамалар биліктен де шығуы мүмкін және шығуға тиіс», – деді мемлекет басшысы.
Президенттің пікірінше, жүзеге асырылған реформалар билік институттары арасындағы тежемелік әрі тепе-теңдік жүйесін қалыптастырып, мемлекеттік басқару сапасын арттырды.
«Алайда барлық реформаның басты мақсаты – халықтың әл-ауқатын арттыру және еліміздің әр өңіріндегі азаматтардың өмір сүру сапасын жақсарту. Бұл үшін Үкіметтің, заң шығарушылардың және бүкіл қоғамның қосымша күш-жігері қажет», – деп қосты Қасым-Жомарт Тоқаев.
Бұған дейін президент 1 шілдеден бастап Қазақстанда мемлекеттік басқару жүйесін ауқымды реформалау ресми түрде басталатынын мәлімдеген болатын. Оның айтуынша, өзгерістер мемлекеттік институттардың жұмыс істеуінің негізгі қағидаттарын қамтып, мамандардың кең ауқымының қатысуын талап етеді.
Сондай-ақ мемлекет басшысы депутаттық корпустың жаңа құрамына заң шығару қызметін заманауи, технологиялық тұрғыдан жетілдіріп, сапалы сараптамалық бағалауға негізделген жаңа тәсілдерге көшіру міндеті жүктелетінін айтты.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
