Қарағанды – Жезқазған жаңа автожолының құрылысы басталды
Жолды 2029 жылы аяқтап, қозғалысты ашу жоспарланып отыр
Республикалық маңызы бар «Қарағанды – Жезқазған» жаңа автожолының құрылысы басталды. Жолдың жалпы ұзындығы – 457 шақырым, оның 122 шақырымы Қарағанды облысының аумағы арқылы өтеді. Құрылысқа тапсырыс беруші – «ҚазАвтоЖол» ҰК» АҚ. Бұл туралы Қарағанды облысы әкімдігінің баспасөз қызметіне сілтеме жасап, Kapital.kz іскерлік ақпарат орталығы хабарлайды.
Құрылыс жұмыстарының басталу рәсіміне премьер-министрдің бірінші орынбасары Нұрлыбек Нәлібаев, Қарағанды облысының әкімі Ермағанбет Бөлекпаев, Ұлытау облысының әкімі Дастан Рыспеков және «ҚазАвтоЖол» ҰК» АҚ басқарма төрағасы Дархан Иманашев қатысты.
«Бүгін біз үшін тарихи күн – «Қарағанды – Жезқазған» автомобиль жолын реконструкциялау жұмыстарын бастаймыз. Бұл – еліміздің көлік жүйесі үшін стратегиялық маңызы бар негізгі инфрақұрылымдық жобалардың бірі. Болашақта бұл жол еліміздің солтүстік және орталық өңірлерін оңтүстікпен байланыстыратын маңызды дәлізге айналады. Жолдың дайын учаскелері бүкіл жоба толық аяқталуын күтпей-ақ кезең-кезеңімен пайдалануға беріледі», – деді Нұрлыбек Нәлібаев.
Жаңа жол қолданыстағы автожолға қатар салынады.
Жоба заманауи қауіпсіздік және сапа талаптарына сай II техникалық санаттағы екі жолақты автомобиль жолының құрылысын көздейді.
«Бұл жобаның ерекшелігі – алғаш рет DBM (Design – Build – Maintain) форматында жүзеге асырылып отыр. Яғни мердігер нысанның бүкіл өмірлік цикліне – жобалаудан бастап құрылысқа және кейінгі жеті жыл бойы күтіп-ұстауға дейін толық жауап береді. Мұндай тәсіл жобалаушылар мен құрылысшылар арасындағы келіспеушіліктердің алдын алып, жобаның қымбаттау және мерзімінің созылу тәуекелдерін азайтуға, сондай-ақ бұрынғы жобаларда кездескен даулы мәселелерді болдырмауға мүмкіндік береді. Барлық жауапкершілік мердігер ұйымның мойнында болады, бұл жобаны тиімді әрі ашық іске асыруға жол ашады. Жұмыстарды 2029 жылы аяқтап, жол қозғалысын ашуды жоспарлап отырмыз», – деді Дархан Иманашев.
Жол құрылысы бір мезгілде төрт учаскеде жүргізіледі. Әрқайсысы бойынша мердігер ұйымдар анықталған.
Қазір құрылысшылар аумақты дайындау, жобалау және жер жұмыстарына кірісті.
«Осы маңызды жобаны қолдағаны үшін мемлекет басшысы мен үкіметке шынайы алғысымды білдіремін. Жақын арада бұл жол бүкіл өңіріміз үшін жаңа мүмкіндіктердің символына айналатынына сенімдімін. Бұл жол өңірлерді ғана емес, адамдарды да байланыстырып, даму мен өркендеуге, жаңа мүмкіндіктерге жол ашсын», – деді Қарағанды облысының әкімі Ермағанбет Бөлекпаев.
«Қарағанды – Жезқазған» автожолын реконструкциялау өңірдегі ең ірі жол жобаларының біріне айналады. Құрылыс аяқталғаннан кейін өңірлер арасындағы көлік қатынасы едәуір жақсарып, жол қозғалысының қауіпсіздігі артады және жол жүру уақыты қысқарады.
«Бұл республикалық маңызы бар автомобиль жолын реконструкциялауды ұзақ жылдар бойы облыс тұрғындары ғана емес, мыңдаған жүргізуші мен жолаушы да асыға күтті. Жобаны қаржыландыру мәселесі шешілген кезде бұл барша жұрт үшін үлкен қуаныш болды», – деді Дастан Рыспеков.
Еске салайық, бұған дейін «Қарағанды – Жезқазған» бағытындағы автожол құрылысы мамыр айында басталатыны хабарланған болатын.
2026 жылдың наурыз айында «Қызылорда – Ақтөбе» автожолын төрт жолаққа кеңейтудің бірінші кезеңі басталды. Сондай-ақ биыл «Бейнеу – Сексеуіл» жобасын Транскаспий халықаралық көлік бағыты аясында іске асыру жоспарланып отыр. Бұл бағытты шамамен 1000 шақырымға қысқартып, жүк жеткізу мерзімін үш тәулікке дейін азайтуға мүмкіндік береді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
