• Басты бет
• Мемлекет
• Құрылтай құрамына жаңа тұлғалар келуі керек: Мәулен Әшімбаев болашақ депутаттық құрам туралы пікір білдірді

Құрылтай құрамына жаңа тұлғалар келуі керек: Мәулен Әшімбаев болашақ депутаттық құрам туралы пікір білдірді

Жаңартылған заң шығарушы органға жас саясаткерлер, әйелдер мен өңір өкілдері қажет, дейді ол

Жаңа Құрылтайдың жасақталуы институционалдық реформа ғана емес, сонымен қатар саясатқа жаңа буын басқарушылардың келуіне мүмкіндік болуы тиіс. Сенат төрағасы Мәулен Әшімбаев журналистермен кездесуде елдің жоғары өкілді органының болашақ құрамын қалай көретіні туралы сұраққа жауап бере отырып, осындай пікір білдірді. Сонымен қатар спикер Сенат қызметі аяқталғаннан кейін аппарат қызметкерлерін қысқарту жоспарланбағанын айтты, деп хабарлайды Kapital.kz іскерлік ақпарат орталығының тілшісі.

Мәулен Әшімбаевтың айтуынша, қазіргі саяси өзгерістер қоғамның әртүрлі санаттарының мүддесін білдіре алатын және Құрылтай жұмысына жаңа серпін беретін жаңа кадрлардың келуін талап етеді.

«Менің терең сенімім – жаңа адамдар келуі керек. Қазіргі кезең өте қарқынды. Сондықтан Құрылтай құрамында жаңа тұлғалар, болашағынан үміт күттіретін саясаткерлер, жастар, әйелдер мен өңір өкілдері көбірек болса, бұл еліміз үшін өте маңызды әрі пайдалы болады деп есептеймін», – деді Сенат төрағасы.

Сонымен бірге Сенат төрағасы бұл пікірін қазіргі депутаттардың қызметіне берілген баға ретінде қабылдамау керектігін атап өтті. Оның пікірінше, бұл – саяси жүйенің заңды жаңаруы және мемлекеттік шешімдер қабылдау процесіне азаматтарды кеңінен тартуға мүмкіндік беретін қадам.

«Мен қазіргі уақыттың қарқынды екенін және мемлекеттік басқару жүйесіне көбірек адамның тартылуы, жоғары өкілді органда жұмыс істеп, қажетті заңдарды қабылдауға атсалысуы қажет екенін айтып отырмын», – деп қосты ол.

Сенат аппаратының алдағы тағдыры туралы сұраққа жауап берген Мәулен Әшімбаев жинақталған кәсіби тәжірибе сақталатынын айтты. Оның сөзінше, аппарат қызметкерлері Құрылтай мен «Халық кеңесі» аппараттарында жұмысын жалғастырады, сондықтан оларды жұмыстан босату жоспарланбаған.

«Біздің аппарат қызметкерлері Құрылтай аппаратының құрамына қосылады, ал бір бөлігі «Халық кеңесі» аппаратына ауысады. Сондықтан біз мамандардан айырылмаймыз. Бұл – менің қағидатты ұстанымым. Осы тұрғыдан алғанда олар әлеуметтік тұрғыда қорғалған», – деп түйіндеді ол.

Айта кетейік, бүгін Қазақстан Сенаты өз тарихындағы соңғы отырысын өткізді.

Бұған дейін Құрылтай құрамында депутаттық әдеп жөніндегі кеңес құрылатыны хабарланған болатын. Бұл жаңа саяси және парламенттік мәдениетті қалыптастыруға ықпал етеді.

Еске салайық, парламент «Қазақстан Республикасының Құрылтайы және оның депутаттарының мәртебесі туралы» конституциялық заң жобасын бірінші оқылымда мақұлдады. Мемлекет басшысы Қасым-Жомарт Тоқаев Құрылтай депутаттарының сайлауы тамыз айында өтетінін мәлімдеген болатын.

2026 жылғы 15 наурызда өткен жалпыреспубликалық референдумда Қазақстанның жаңа Конституциясы қабылданды. Жаңартылған Негізгі заң 1 шілдеден бастап ресми түрде күшіне енеді. Оған сәйкес Қазақстан Парламенті бір палаталы болады. Оның құрамынан Сенат шығарылып, жаңа заң шығарушы орган Құрылтай деп аталады. Сонымен қатар «Халық кеңесі» құрылады. Халық кеңесінің құрамына 126 адам енеді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз