Сенат өз тарихындағы соңғы отырысын өткізді
Мәулен Әшімбаев жоғарғы палатаның жұмысын қорытындылады
Қазақстанда VIII сайланым Сенатының төртінші сессасының қорытынды пленарлық отырысы өтті. Бұл елдің жоғары өкілді органының жаңа моделі – Құрылтайға көшуіне байланысты, деп хабарлайды Kapital.kz іскерлік ақпарат орталығы.
Қорытынды отырыс Сенат төрағасы Мәулен Әшімбаевтың төрағалығымен өтті. Ол әріптестеріне арнаған сөзінде президентке, депутаттық корпусқа, аппарат қызметкерлері мен журналистерге бірлескен жұмыс пен ауқымды реформаларды жүзеге асыруға қосқан үлесі үшін алғыс айтты.
«Бүгін Қазақстан Республикасы Парламенті Сенатының 30 жылдық тарихындағы соңғы отырысы өтті. Ертең палаталардың бірлескен отырысында парламенттің кезекті сессасы ресми түрде аяқталады», – деді Мәулен Әшімбаев.
Ол 1 шілдеден бастап жаңа Конституцияға сәйкес парламенттің өкілеттігі тоқтатылатынын, ал тамыз айында Құрылтай депутаттарының сайлауы өтетінін еске салды.
«Осылайша, 1995 жылғы Конституция негізінде жұмыс істеген қос палаталы парламент өзінің 30 жылдық тарихи миссиясын лайықты түрде аяқтап отыр... Ең алдымен, бізге жоғары сенім білдіргені және реформаларды бірлесіп жүзеге асыруға мүмкіндік бергені үшін Мемлекет басшысына зор алғысымды білдіремін», – деді Сенат спикері.
Оның айтуынша, сенаторлар өздеріне жүктелген міндеттерді толық орындап шықты, ал қабылданған шешімдер Қазақстандағы ауқымды саяси өзгерістердің құрамдас бөлігіне айналды. Сондай-ақ ол елдің одан әрі дамуы жаңартылған Конституция мен Әділетті Қазақстанды құру бағыты аясында жалғасатынын, бұл ретте мемлекеттік институттарды жетілдіруге ерекше мән берілетінін атап өтті.
Сенаттың 30 жылдық қызметі барысында 890-нан астам пленарлық отырыс өткізіліп, 3,5 мыңнан астам заң қабылданды.
Мәулен Әшімбаев бұқаралық ақпарат құралдарының өкілдеріне де алғыс білдірді. Оның айтуынша, журналистер парламент жұмысы туралы қоғамды уақытылы, кәсіби әрі объективті түрде хабардар етіп, мемлекет пен азаматтар арасындағы ашық диалогтың қалыптасуына ықпал етті.
Еске салайық, 2026 жылғы 30 маусымда қос палаталы парламенттің соңғы бірлескен отырысы өтеді. Онда Мемлекет басшысы парламент жұмысының қорытындысын шығарады деп күтілуде.
2026 жылғы 15 наурызда өткен республикалық референдумда Қазақстанның жаңа Конституциясы қабылданды. Жаңартылған Негізгі заң 1 шілдеден бастап күшіне енеді. Оған сәйкес Қазақстан Парламенті бір палаталы органға айналып, оның құрамынан Сенат шығарылады. Жаңа заң шығарушы орган Құрылтай деп аталады. 2026 жылғы мамырда парламенттің бірлескен отырысында «Қазақстан Республикасының Құрылтайы және оның депутаттарының мәртебесі туралы» конституциялық заң жобасы мақұлданған болатын.
Мемлекет басшысы Қасым-Жомарт Тоқаев Құрылтай депутаттарының сайлауы Қазақстанда биылғы тамыз айында өтетінін мәлімдеген еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
