Қазақстан мен Өзбекстан су саласындағы серіктестікті нығайтуда
Сенат трансшекаралық су ресурстарын бірлесіп басқару туралы келісімді мақұлдады
Сенат Қазақстан мен Өзбекстан арасындағы трансшекаралық су нысандарын басқару тетіктерін жетілдіруді көздейтін келісімді ратификациялады. Құжат су ресурстарын пайдалануды үйлестіруді, гидротехникалық құрылыстарды қауіпсіз пайдалануды және су дипломатиясы саласындағы ынтымақтастықты нығайтуды көздейді, деп хабарлайды Kapital.kz іскерлік ақпарат орталығының тілшісі.
Сенат депутаты Әли Бектаев атап өткендей, Қазақстан үшін трансшекаралық су ресурстарын тиімді пайдалану мәселелерінің стратегиялық маңызы зор. Өйткені елдің су теңгерімінің едәуір бөлігі мемлекеттік шекарадан өтетін өзендерден құралады. Оның айтуынша, көршілес мемлекеттермен сенім, өзара құрмет және тең құқықты серіктестік негізіндегі ықпалдастықты дамыту — мемлекеттік саясаттың басты бағыттарының бірі.
«Келісімнің басты мақсаты – трансшекаралық су ресурстарын басқарудың тұрақты әрі тиімді тетіктерін құру, мемлекетаралық су шаруашылығы нысандарының қауіпсіз жұмыс істеуін, сондай-ақ су ресурстарының әділ әрі ұтымды бөлінуін қамтамасыз ету. Бұл құжаттың әсіресе елдің оңтүстік өңірлері үшін маңызы өте жоғары. Түркістан және Қызылорда облыстарының, сондай-ақ Сырдария алабындағы басқа да аумақтардың әлеуметтік-экономикалық дамуы су ресурстарының жеткіліктілігіне тікелей байланысты. Өйткені өндірілетін ауыл шаруашылығы өнімінің көлемі де, сапасы да осыған тәуелді. Сондықтан Сырдария өзенінің гидрологиялық режимі – бұл тек су шаруашылығының мәселесі емес», – деді Әли Бектаев Сенаттың жалпы отырысында.
Сенатор сумен жабдықтаудың тұрақтылығы аграрлық сектордың орнықтылығымен, ауыл шаруашылығы тауарын өндірушілердің әл-ауқатымен және өңірлерді одан әрі дамытумен тікелей байланысты екенін қадап айтты.
«Осыған байланысты Қазақстан мен Өзбекстан арасындағы су саласындағы ынтымақтастықтың маңызы жылдан-жылға артып келеді, – деп атап өтті сенатор. – Кейінгі жылдары қалыптасқан өзара түсіністік пен тұрақты диалог қазірдің өзінде нақты нәтижесін беруде. Осының арқасында вегетациялық кезеңде су ресурстарын бөлу, су қоймаларының жұмыс кестесін келісу және сумен тұрақты қамтамасыз ету мәселелері жүйелі түрде шешіліп келеді. Қазіргі вегетациялық маусым — бұған айқын дәлел. Бүгінгі таңда Арал-Сырдария алабының су шаруашылығындағы жағдай тұрақты. Шардара су қоймасы 90 пайызға толды», — деді депутат.
Оның пікірінше, екі ел арасындағы қол жеткізілген ықпалдастық деңгейі маусымдық сын-қатерлерге жедел әрі тиімді жауап беруге мүмкіндік береді, сондай-ақ халық пен экономика үшін су пайдалану көлемін алдын ала болжауға жағдай жасайды. Ратификацияланған келісім екі елдің мүддесі үшін ортақ су ресурстарын ұзақ мерзімді әрі теңгерімді басқарудың қосымша негізіне айналуы тиіс.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
