Қазақстанда киім-кешек пен жеңіл өнеркәсіп тауарларын міндетті таңбалау енгізіледі
Өнеркәсіп министрлігі тауарларды қадағалаудың жаңа қағидаларын әзірледі
Қазақстанда жеңіл өнеркәсіп тауарларын міндетті таңбалау және қадағалау жүйесі енгізілуі мүмкін. Бұл туралы Өнеркәсіп және құрылыс министрлігі жариялаған бұйрық жобасында айтылған, деп хабарлайды Kapital.kz іскерлік ақпарат орталығы.
Ведомство «Жеңіл өнеркәсіп тауарларын сәйкестендіру құралдарымен таңбалау және қадағалау қағидаларын бекіту туралы» бұйрық жобасын қоғамдық талқылауға шығарды.
«Бұйрық жобасында жеңіл өнеркәсіп тауарларын сәйкестендіру құралдарымен таңбалау және қадағалау қағидаларын бекіту көзделеді», – делінген құжатта.
Министрліктің түсіндіруінше, жоба жеңіл өнеркәсіп тауарларын міндетті таңбалау және қадағалау жүйесін енгізу мақсатында әзірленген.
Жаңа талаптар енгізілген жағдайда нарықтағы өнім қозғалысын бақылау күшейіп, көлеңкелі айналым көлемін азайтуға мүмкіндік беріледі. Сонымен қатар тұтынушылар тауардың заңды өндірілгенін және оның шығу тегін тексере алады.
Қазіргі таңда Қазақстанда дәрі-дәрмек, аяқ киім және темекі өнімдерін таңбалау жүйесі енгізілген. Сонымен қатар сыра, мотор майы мен ББҚ-ны цифрлық таңбалау кезең-кезеңмен енгізілген.
Бұған дейін Қазақстанда жеңіл өнеркәсіпті дамыту бағдарламасы әзірленгені хабарланды. Өнеркәсіп және құрылыс министрлігі бизнес-қоғамдастықпен бірлесіп жаңа бастамалар дайындамақ, саладағы өндіріс көлемі 260 млрд теңгеге жетті.
Сондай-ақ Қазақстаның Жеңіл өнеркәсіп кәсіпорындары қауымдастығының президенті Салтанат Әбдікәрімова Қазақстанның жеңіл өнеркәсібінде маман тапшы екенін айтты. Оның сөзінше, кәсіпорындарға тігіншілер, пішініші-тігіншілер, конструкторлар, тігін жабдықтарының механиктері мен аяқ киім саласының мамандары жетіспейді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
