Қазақстанда жеңіл өнеркәсіпті дамыту бағдарламасы әзірленеді
ӨҚМ бизнес-қоғамдастықпен бірлесіп жаңа бастамалар дайындамақ, саладағы өндіріс көлемі 260 млрд теңгеге жетті
Қазақстанда жеңіл өнеркәсіпті дамытуға бағытталған жаңа бағдарламаны әзірлеу жоспарланып отыр. Бұл мәселе Үкіметте ҚР Премьер-министрінің орынбасары – ұлттық экономика министрі Серік Жұманғарин төрағалық еткен экономикалық өсуді қамтамасыз ету жөніндегі штаб отырысында талқыланды, деп хабарлайды Kapital.kz іскерлік ақпарат орталығы.
Жиынға салалық қауымдастықтардың, оның ішінде Qaz Textile Industry жеңіл өнеркәсіп кәсіпорындарының ұлттық бірлестігі, сондай-ақ «Жеңіл өнеркәсіп кәсіпорындарының өзін-өзі реттейтін ұйымы» ЗТБ өкілдері қатысты. Сонымен қатар ірі кәсіпорындар – AZALA Group, Qazaq Tigin Fabrikasy, Қазжеңілөнеркәсіп-Алматы, Глобал-Арнайыкиім және ТаразТеріАяқкиім басшылары пікір алмасты.
Өнеркәсіп және құрылыс министрлігі мәліметінше, соңғы бес жылда жеңіл өнеркәсіп тұрақты өсім көрсетіп келеді. 2025 жылдың қорытындысы бойынша өндіріс көлемі 13,2%-ға артып, 260 млрд теңгеге жетті. Бұл ретте саладағы нақты көлем индексінің өсімі 3% деңгейінде жоспарланған.
Қазір өңдеу өнеркәсібінің құрылымында жеңіл өнеркәсіптің үлесі 0,8%-ды құрайды. Саланың құрылымында тоқыма өндірісінің үлесі 60%-дан асады, киім өндірісі – 32%, ал аяқ киім мен былғары бұйымдары – 6,5%.
Сала кәсіпорындарының 97%-дан астамы шағын бизнес субъектілеріне тиесілі. Осыған байланысты ӨҚМ бизнес-қоғамдастықпен бірлесіп, жеңіл өнеркәсіпті дамытуға бағытталған жаңа бағдарламаны әзірлеуді бастамақ.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
