Жұмыс берушілер жұмыскерлеріне 719 млн теңгеден астам жалақы қарыз
Елімізде 2,7 мыңнан астам еңбек құқығы бұзушылығы анықталды
Қазақстанда кәсіпорындардағы жалақы бойынша берешек 719 млн теңгеден асты, деп хабарлайды Kapital.kz іскерлік ақпарат орталығы еңбек және халықты әлеуметтік қорғау министрлігінің баспасөз қызметіне сілтеме жасап.
«2026 жылғы 1 мамырдағы жағдай бойынша мемлекеттік еңбек инспекторлары республика бойынша 153 кәсіпорында 1,2 мыңнан астам қызметкерге қатысты жалпы сомасы 719 млн теңгеден асатын жалақы қарызын анықтады. Сонымен қатар, түрлі ұйымдарда жүргізілген тексерулер барысында 2,7 мыңнан астам еңбек құқығы бұзушылығы тіркелді. Жалақы бойынша берешек пен еңбек құқығы бұзылған кәсіпорын басшыларына орындалуы міндетті 1 630 нұсқама беріліп, жалпы сомасы 187,4 млн теңгеден астам айыппұл салынды», – делінген хабарламада.
Қабылданған шаралардың нәтижесінде, соның ішінде жалақы қарызын өтеудің қатаң кестелері мен мерзімдерін белгілеу арқылы 859 қызметкердің құқығы қорғалды. Оларға 535,8 млн теңге төленді.
«Еңбек және халықты әлеуметтік қорғау министрлігі еңбек заңнамасының сақталуына мемлекеттік бақылауды қамтамасыз ету мәселелерін ерекше бақылауда ұстап отыр. 2026 жылғы 1 мамырдағы дерек бойынша мемлекеттік еңбек инспекторлары 2 446 тексеру жүргізіп, 2 799 бұзушылықты анықтады. Оның ішінде: еңбек саласында – 2 340, еңбек қауіпсіздігі және еңбекті қорғау саласында – 433, халықты жұмыспен қамту саласында – 26. Қабылданған шаралар нәтижесінде 21,9 мың қызметкердің еңбек құқықтары қорғалды», – деп хабарлайды министрлік.
Айта кетейік, 2025 жылы Қазақстанда 8,7 мыңнан астам еңбек құқығы бұзушылығы анықталып, ол 51 мың қызметкердің құқығына әсер еткен.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
