Қазақстанда кімдер қылмыстық және әкімшілік рақымшылыққа ілігуі мүмкін
Рақымшылық азаматтар мен мемлекет қауіпсіздігіне қатер төндірмейтін құқық бұзушылықтарды ізгілендіруге бағытталған
Мәжіліс депутаттары елдің жаңа Конституциясы қабылданғаннан кейін Қазақстанда амнистия өткізуге байланысты заң жобаларының пакетін жұмысқа қабылдады. Сөз қылмыстық, сондай-ақ әкімшілік рақымшылық және заңнамаға енгізілетін ілеспе өзгерістер туралы болып отыр, деп хабарлайды Kapital.kz іскерлік ақпарат орталығының тілшісі.
Мәжіліс депутаты Снежанна Имашева хабарлағандай, депутаттар Әкімшілік құқық бұзушылық туралы кодекске және Атқарушылық іс жүргізу мен Сот орындаушыларының мәртебесі туралы заңға енгізілетін түзетулерді де қарастырады.
«Бұл заң жобалары Парламент депутаттарының бастамасымен әзірленді. Заң жобалары Мемлекет басшысының республикалық референдумда жаңа Конституцияның қабылдануына байланысты қылмыстық және әкімшілік рақымшылық жариялауына орай дайындалды. Жобаларда қылмыстық рақымшылық шеңберінде зиян келтіруге әкеп соқпаған немесе ол толық өтелген жағдайда қылмыстық теріс қылықтар мен жеңіл немесе орташа ауырлықтағы қылмыстар үшін жауаптылықтан босату, сондай-ақ зиян толық өтелген жағдайда ауыр және ерекше ауыр қылмыстар бойынша жаза мерзімдерін қысқарту ұсынылады», — деді Снежанна Имашева Мәжілістің жалпы отырысында.
Оның айтуынша, әкімшілік рақымшылық жеке тұлғаларды, кәсіпкерлерді, жеке нотариустарды, адвокаттарды, қандастарды және Қазақстанның басқа да азаматтарын айыппұлдардан босатуды көздейді.
«Рақымшылық азаматтар мен мемлекет қауіпсіздігіне қатер төндірмейтін құқық бұзушылықтарды ізгілендіруге бағытталған. Заң жобаларын жұмысқа қабылдауды ұсынамыз және қолдауларыңызды сұраймыз», — деп түйіндеді Снежанна Имашева.
Еске сала кетейік, ҚР жаңа Конституциясының қабылдануына арналған салтанатты іс-шара барысында Мемлекет басшысы Қазақстанда әкімшілік рақымшылық өткізілетінін хабарлаған болатын. Одан соң Қазақстанда әкімшілік амнистия аясында айыппұлдан кімдер босатылатыны белгілі болды. Негізгі екпін әлеуметтік жағдайы қиын азаматтарды қолдауға бағыттау ұсынылды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
