• Басты бет
• Мемлекет
• Астана ерекше мәртебеге ие болады: Конституциялық заң жобасы парламентте мақұлданды

Астана ерекше мәртебеге ие болады: Конституциялық заң жобасы парламентте мақұлданды

Басқарушылық функциялар қайта бөлініп, жергілікті билік органдарының рөлі күшейеді

Парламент палаталарының бірлескен отырысында депутаттар «Қазақстан Республикасы астанасының мәртебесі туралы» Конституциялық заң жобасын бірінші оқылымда мақұлдады, деп хабарлайды Kapital.kz іскерлік ақпарат орталығының тілшісі.

Заң жобасының жаңалықтарын ұлттық экономика министрінің міндетін атқарушы Бауыржан Омарбеков таныстырды.

«Конституциялық заң жобасы астананың елдің саяси, әкімшілік және экономикалық орталығы ретіндегі ерекше рөлін бекітуге мүмкіндік береді. Конституциялық заң жобасының мақсаттары мен міндеттері астананың ерекше мәртебесін анықтау, мемлекеттік басқарудың тиімділігін арттыру және тұрғындар үшін жайлы әрі қауіпсіз қалалық ортаны қалыптастыру болып табылады», – деді ол.

Оның айтуынша, құжат астана мәслихаты мен әкімдігінің өкілеттіктерін нақтылауға және жүйелеуге бағытталған. Атап айтқанда, оларға сәулет және қала құрылысы, жол жүрісін ұйымдастыру, халықты әлеуметтік қорғау, экология, туризм және коммуналдық меншікті басқару салаларындағы негізгі құзыреттер беріледі.

«Мәслихат пен әкімдіктің құзыреті жоғарыда аталған түзетулермен шектелмейді, оларда басқа да салалық заңдарда көзделген құзыреттер сақталады. Бұл ретте астананың қала маңындағы аймағының шекарасы мен көлемі және оны пайдалану тәртібі қала мен облыс мәслихаттары мен әкімдіктерінің бірлескен ұсынысы негізінде үкіметпен анықталады», – деп түсіндірді спикер.

Заң жобасында астананың әлеуметтік-экономикалық дамуына, тыныс-тіршілігін қамтамасыз етуге, жолдарды санитарлық тазартуға, туризмді дамытуға және жер қатынастарын реттеуге қатысатын ұйымдардың құқықтық мәртебесі бөлек блокпен бекітіледі.

«Көлік инфрақұрылымын басқару, жол жүрісін және қаланың тұрақ кеңістігін ұйымдастыру функцияларын Жол жүрісін ұйымдастыру орталығы жүзеге асыратын болады. Астананың орманды саябақ аймағы – бұл қала аумағының шегіндегі, қорғаныстық, сауықтыру және рекреациялық функцияларды орындауға арналған және осы функцияларды атқаратын жерлер. Оның шекараларын белгілеу мен өзгертуді астана әкімдігінің ұсынысы бойынша үкімет жүзеге асырады. Орманды саябақ аймағының экологиялық жай-күйіне теріс әсер ететін кез келген қызметті жүзеге асыруға тыйым салу көзделеді», – деп қорытындылады Бауыржан Омарбеков.

Айта кетейік, заң жобасы мәжілістің қарауына 28 сәуірде түсті.

Бұдан бұрын Астанада қалдықтарды қайта өңдейтін экопарк салынатыны хабарланған болатын.

Елордада 173 қалалық локацияны түрлендіру жоспарланған. Қала әлемнің қаржы орталықтары рейтингінде үш сатыға жоғарылады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз