Сайлау кезіндегі онлайн үгіт: Теңсіздік үшін платформаларға айыппұл салынады
Қазақстанда онлайн-платформалардағы сайлау үгітін жүргізу тәртібі өзгеріп, жауапкершілік күшейтіледі
Қазақстанда онлайн-платформалар арқылы сайлауалды үгіт жүргізу тәртібіне өзгерістер енгізіледі. Тиісті түзетулер «Қазақстан Республикасындағы сайлау туралы» Конституциялық заң жобасының нормаларын іске асыру мақсатында әзірленген ілеспе заң жобаларында қарастырылған. Енгізілетін өзгерістерді бүгін Мәжілісте Премьер-Министрдің орынбасары Серік Жұманғарин таныстырды, деп хабарлайды Kapital.kz іскерлік ақпарат орталығының тілшісі.
Оның сөзінше, жаңа нормалар онлайн-платформаларды пайдалану кезінде барлық кандидаттарға тең жағдай жасауды реттеуге бағытталған.
«Әкімшілік құқық бұзушылық туралы» Кодексте онлайн-платформаларда үгіт материалдарын орналастырудан бас тартқаны және кандидаттар үшін тең емес жағдайлар жасағаны үшін жеке тұлғаларға 20, заңды тұлғаларға 50 айлық есептік көрсеткіш көлемінде әкімшілік жауапкершілік белгіленді», деді Серік Жұманғарин.
Сонымен қатар кандидаттар мен саяси партияларға сайлау қорларынан тыс материалдық көмек алуға тыйым салынады. Сайлау қорларынан бөлек қаржылық немесе өзге де материалдық көмек алған жағдайда жеке тұлғаларға 25 айлық есептік көрсеткіш, заңды тұлғаларға 55 айлық есептік көрсеткіш көлемінде әкімшілік жауапкершілік қарастырылған.
«Қолданыстағы Конституциялық заңда қаржыландыру ережелерін бұзған жағдайда кандидатты немесе партиялық тiзiмдi тiркеу жөніндегі шешiмнiң күшiн жою туралы конституциялық жауапкершілік көзделгенін де атап өту қажет. Бұл, сайлау науқандарын жасырын және бақылаусыз қаржыландыруға жол бермеуге бағытталған», деп қосты ол.
Сондай-ақ заңжа кандидаттардың сайлауалды үгітке бөлінген мемлекеттік бюджет қаражатын пайдалану тәртібін бұзғаны үшін жауапкершілік күшейтіледі. Мұндай құқықбұзушылықтар үшін әкімшілік айыппұл көлемі 5 айлық есептік көрсеткіштен 25 айлық есептік көрсеткішке дейін ұлғайтылады.
Түзетулерде мәслихаттардың құзыретін «Қазақстан Республикасындағы сайлау туралы» Конституциялық заң нормаларымен сәйкестендіруге арналған редакциялық өзгерістер де қамтылған.
Айта кетейік, «Қазақстан Республикасындағы сайлау туралы» Конституциялық заңға өзгерістер мен толықтырулар енгізу туралы» заң жобасы Парламент палаталарының бірлескен отырысында қаралып, бірінші оқылымда мақұлданған болатын.
Құжатта сайлау рәсімдерінің ашықтығын арттыру, сайлау қорларынан тыс қаржыландыруға тыйым салу, сондай-ақ әкім сайлауында кандидаттар тең дауыс жинаған жағдайда қайта дауыс беру тәртібін енгізу көзделген. Сонымен қатар бір адамның бір мезгілде мәслихат депутаттығына және әкім лауазымына кандидат болуына шектеу қойылады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
