Қазақстан ормандарына ЖИ негізіндегі өртті ерте анықтау жүйесі енгізіледі

Премьер-министр Олжас Бектенов «Семей орманы» мемлекеттік орман табиғи резерватында болып, орман өрттерін ерте анықтау жүйесінің дайындығын тексерді, деп хабарлайды Kapital.kz іскерлік ақпарат орталығы Үкіметтің баспасөз қызметіне сілтеме жасап.

Резерват аумағында ЖИ негізінде жұмыс істейтін өртті ерте анықтау жүйесі пилоттық режимде енгізілді. Технология өрт ошақтарын алыс қашықтықтан және кез келген ауа райында анықтауға мүмкіндік береді.

Оқу-жаттығу барысында жүйенің жұмысы көрсетілді. Мамандар цифрлық технологиялардың тиімділігін және өрт сөндіру қызметтерінің өзара әрекет алгоритмін таныстырды.

Экология және табиғи ресурстар вице-министрі Нұрлан Құрмалаевтың айтуынша, тәулік бойы жұмыс істейтін бейнемониторинг жүйелері тепловизиялық және оптикалық камералар арқылы өрт белгілерін бастапқы кезеңде автоматты түрде анықтайды. Өрт немесе түтін тіркелген жағдайда жүйе жедел басқару орталығына бірден сигнал береді.

Қазіргі уақытта мұндай орталықтар «Семей орманының» барлық 10 филиалында ашылған. Жүйе 100-ден астам сынақтан өткен. Оны метеокешендермен және найзағайды анықтау станцияларымен біріктіру жұмыстары жүргізіліп жатыр.

Аталған технология кезең-кезеңімен Қазақстан бойынша енгізіліп жатыр. Қазір жүйе Ақмола облысындағы орман шаруашылықтарында, Астана маңындағы қорықтарда, сондай-ақ Қарқаралы мен Баянауыл ұлттық парктерінде іске қосылған. Іле-Алатауы, Сайрам-Өгем және «Көлсай көлдері» ұлттық парктерінде енгізу жұмыстары аяқталуға жақын.

Биыл шілде айына дейін елдегі 24 табиғи аумақты қамту, ал қыркүйекте жүйені толық өнеркәсіптік пайдалануға беру жоспарланып отыр.

Премьер-министр технологияларды жердегі патрульдеумен күшейту қажет екенін атап өтті. Оның айтуынша, өрт қаупі жоғары кезеңде орман күзетінің тұрақты жұмысы қамтамасыз етілуі тиіс.

Жалпы, Қазақстанда орман шаруашылығын жаңғыртуға 2024-2025 жылдары 21,5 млрд теңге бөлініп, нәтижесінде саладағы техникалық қамтамасыз ету деңгейі 87%-ға жетті.

Үкімет мәліметінше, қосымша 35 млрд теңгеге 1000-нан астам өртке қарсы техника сатып алу жоспарланған. Бұл жұмыстарды 2026 жылдың мамырына дейін толық аяқтау көзделіп отыр.