Қазақстанда жыл басынан бері 3 мыңнан астам адам қандас мәртебесін алды

2026 жылдың басынан бері Қазақстанда 3 335 этникалық қазақ тарихи отанына оралып, қандас мәртебесін алды, деп хабарлайды  Kapital.kz іскерлік ақпарат орталығы.

Еңбек және халықты әлеуметтік қорғау министрлігінің ақпаратына сәйкес, олардың басым бөлігі Қытай (47,8%) мен Өзбекстан (43,6%) елдерінен, сонымен қатар Түрікменстан – 2,7%, Ресей – 2%, Моңғолия – 2,2% және өзге елдерден 1,7% келген.

Қоныс аударушылардың жас құрылымында еңбекке қабілетті азаматтар үлесі басым – 58,1%. Ал 33,1%-ы кәмелетке толмағандар болса, 8,8%-ын зейнеткерлер құрайды. Білім деңгейіне келсек, еңбекке қабілетті жастағылардың 13,1%-ы жоғары білімді, 27,1%-ы орта кәсіби білім алған, 51,9%-ы жалпы орта білімді, ал 7,9%-ының білімі жоқ.

Қандастар еліміздің әртүрлі өңірлеріне қоныстанып жатыр. Еңбек күші тапшы аймақтар ретінде Ақмола облысы, Абай облысы, Қостанай облысы, Павлодар облысы, Атырау облысы, Батыс Қазақстан облысы, Шығыс Қазақстан облысы және Солтүстік Қазақстан облысы анықталған.

2026 жылға арналған қабылдау квотасы 2 281 адамды құрайды. Жылдың алғашқы екі айында аталған өңірлерге 569 қандас қоныстанған.

Айта кетейік, мемлекет тарапынан қоныс аударушыларға қолдау шаралары қарастырылған. Атап айтқанда, көшуге біржолғы субсидия ретінде әр отбасы мүшесіне 70 АЕК (302,8 мың теңге) төленеді. Сондай-ақ тұрғын үй жалдау мен коммуналдық қызметтерге бір жылға 15-тен 30 АЕК-ке дейін (64,9-дан 129,8 мың теңгеге дейін) өтемақы беріледі.

Жыл басынан бері 139 қандасқа түрлі қолдау көрсетіліп, оның ішінде 108 адам тұрақты жұмысқа орналастырылған.