Орталық комиссия референдумның қорытынды нәтижелерін жариялады

Орталық референдум комиссиясы 15 наурызда өткен дауыс берудің қорытынды нәтижелерін жариялады, деп хабарлайды Kapital.kz іскерлік ақпарат орталығы ОРК баспасөз қызметіне сілтеме жасап.

«Қазақстан Республикасының «Республикалық референдум туралы» Конституциялық заңының 31 және 33-баптарына сәйкес, сондай-ақ облыстар, республикалық маңызы бар қалалар мен астананың аумақтық референдум комиссиялары ұсынған хаттамалар негізінде Орталық референдум комиссиясы мынадай мәліметтерді хабарлайды: референдумға қатысуға құқығы бар азаматтардың жалпы саны – 12 482 613 адам; дауыс беруге қатысқан азаматтар саны – 9 127 192 адам немесе 73,12%; референдумға шығарылған мәселе бойынша оң шешімге дауыс бергендер – 7 954 667 адам немесе дауыс беруге қатысқандардың 87,15%-ы; қарсы дауыс бергендер – 898 099 адам; жарамсыз деп танылған бюллетеньдер саны – 146 558», – деп хабарлады комиссия.

Орталық комиссияның түсіндіруінше, «2026 жылғы 12 ақпанда бұқаралық ақпарат құралдарында жарияланған Қазақстан Республикасының жаңа Конституциясын қабылдайсыз ба?» деген сұрақ бойынша өткен референдум өтті деп саналады. Себебі дауыс беруге қатысуға құқығы бар азаматтардың жартысынан көбі, яғни 73,12%-ы қатысқан.

Сонымен қатар, жаңа Конституция қабылданды деп есептеледі. Өйткені оны қолдап дауыс бергендер саны дауыс беруге қатысқан азаматтардың жартысынан асып, 87,15%-ды құрады және бұл көрсеткіш облыстардың, республикалық маңызы бар қалалар мен астананың үштен екісінен астамында тіркелген.

Еске салайық, 2026 жылғы 15 наурызда Қазақстанда жаңа Конституция бойынша жалпыұлттық референдум өтті. Алдын ала деректер бойынша сайлаушылардың қатысу деңгейі 73,24% болды.

Сондай-ақ, Еуразиялық интеграция институты жүргізген экзитпол нәтижесіне сәйкес, сауалнамаға қатысқандардың 86,7%-ы жаңа Конституция жобасын қолдап дауыс берген.

Жаңа Конституция бойынша республикалық референдум 2026 жылғы 15 наурызға президенттің 2026 жылғы 11 ақпандағы жарлығымен тағайындалған болатын.