Қазақстанда наурыз мерекесіне орай 160-қа жуық қосымша әуе рейсі іске қосылады

Қазақстандық әуе компаниялары наурыз мерекесіне орай шамамен 160 қосымша әуе рейсін іске қосады, деп хабарлайды Kapital.kz іскерлік ақпарат орталығы Азаматтық авиация комитетінің баспасөз қызметіне сілтеме жасап.

«Наурыз мерекесі қарсаңында қазақстандық әуе компаниялары ішкі рейстер санын арттыруда. Air Astana және FlyArystan компаниялар тобы 2026 жылғы 16-29 наурыз аралығында ел ішіндегі сұранысы жоғары бағыттар бойынша 146 қосымша рейс жоспарлап отыр, оның 80-і Алматы – Астана бағытына тиесілі. Сонымен қатар Алматы, Астана және Ақтаудан Ақтөбе, Шымкент, Түркістан, Қарағанды, Қостанай, Семей, Ақтау, Атырау, Өскемен, Орал қалаларына қосымша рейстер қарастырылған», – деп хабарлайды комитет.

Өз кезегінде SCAT әуе компаниясы да қосымша рейстерді іске қосуды жоспарлап отыр.

«19-21 наурыз аралығында Алматы – Астана бағыты бойынша 5 рейс, сондай-ақ Шымкент – Ақтау бағыты бойынша 1 рейс орындалады. Бұдан бөлек, 23-26 наурыз аралығында Алматы – Астана бағыты бойынша 4 рейс, сондай-ақ Шымкент – Астана және Ақтау – Астана бағыттары бойынша бір-бір рейстен жүзеге асырылады», – делінген хабарламада.

Жолаушыларға қосымша рейстер мен әуе билеттерінің қолжетімділігі туралы ақпаратты әуе компаниялардың ресми сайттарынан алдын ала тексеру және сапарды жоспарлау кезінде билеттерді ертерек рәсімдеу ұсынылады.

Айта кетейік, Наурыз мерекесіне (21-23 наурыз) байланысты Қазақстан азаматтары бес күн қатарынан – 21-25 наурыз аралығында демалады. 21 және 22 наурыз сенбі мен жексенбіге сәйкес келгендіктен, демалыс күндері 24 және 25 наурызға (сейсенбі, сәрсенбі) ауыстырылды. Ал 23 наурыз дүйсенбіге түсіп, ресми мереке күні болып саналады.