Шавкат Мирзиёев Қасым-Жомарт Тоқаевты референдумның сәтті өтуімен құттықтады

Мемлекет басшысы Өзбекстан президентімен телефон арқылы сөйлесті, деп хабарлайды Kapital.kz іскерлік ақпарат орталығы Ақорданың баспасөз қызметіне сілтеме жасап.

Әңгіме барысында Шавкат Мирзиёев Қасым-Жомарт Тоқаевты Қазақстан Республикасының жаңа Конституциясы жобасы бойынша референдумның сәтті өтуімен құттықтады.

Өзбекстан президенті атап өткендей, референдум нәтижелері Қасым-Жомарт Тоқаевтың басшылығымен жүргізіліп жатқан ауқымды реформалардың халықтың сеніміне ие екенін айқын көрсетеді.

Мемлекет басшысы Шавкат Мирзиёевке қолдау көрсеткені және Өзбекстаннан, соның ішінде халықаралық ұйымдар құрамында бақылаушылар миссиясын жібергені үшін алғыс айтты.

Қасым-Жомарт Тоқаевтың айтуынша, жаңа Конституция – замана талабына сай келетін, прогрессивті құжат және мемлекеттің тұрақты әрі жан-жақты дамуын қамтамасыз етуге бағытталған. Оның сөзінше, реформалар барысында халықаралық серіктестермен, әсіресе Қазақстанның ең жақын көршілері мен одақтастарымен ынтымақтастықты нығайтуға ерекше назар аударылады.

Сондай-ақ әңгімелесушілер стратегиялық серіктестік пен одақтастық рухында тұрақты түрде нығайып келе жатқан қазақ-өзбек қатынастарының оң серпінін атап өтті.

Тараптар бұған дейін қол жеткізілген келісімдер мен Жоғары мемлекетаралық кеңес шешімдерінің іске асырылу барысына қанағаттанушылық білдірді. Барлық деңгейде өзара іс-қимылды жалғастыру туралы келісімге қол жеткізілді.

Президенттер өңірлік және халықаралық күн тәртібіндегі өзекті мәселелер бойынша пікір алмасты, сондай-ақ алдағы кездесулердің кестесін қарастырды.

Айта кетейік, 2026 жылғы 15 наурызда Қазақстанда жаңа Конституция бойынша жалпыхалықтық референдум өтті. Дауыс беруге қатысу деңгейі дауыс беру тізіміне енгізілген азаматтардың 73,24%-ын құрады. Орталық референдум комиссиясының алдын ала деректеріне сәйкес, Қазақстанда жаңа Конституцияға азаматтардың 87,15%-ы дауыс берген.

Бұған дейін Қазақстан Республикасының жаңа Конституциясы бойынша республикалық референдумда Еуразиялық интеграция институты жүргізген экзитпол нәтижелері жарияланған болатын. Оған сәйкес, сауалнамаға қатысқандардың 86,7%-ы жаңа Конституция жобасын қабылдауды қолдап дауыс берген.

Жаңа Конституция бойынша республикалық референдум 2026 жылғы 15 наурызға 2026 жылғы 11 ақпандағы президент жарлығымен белгіленген болатын.

Премьер-министр Олжас Бектенов қазақстандықтарды жаңа Конституцияның қабылдануымен құттықтады.

Мемлекет басшысы Қазақстанда Конституция күні 15 наурызда атап өтілетінін хабарлады.