Түркістан облысындағы ауылшаруашылық кооперативінде мемлекеттік субсидияның ұрланғаны анықталды

Түркістан облысындағы бір ауылшаруашылық кооперативінің төрайымы мемлекеттік субсидия алу мақсатында ақпараттық жүйеге жалған мәлімет енгізгені анықталды. Осылайша 20 млн теңгеден астам қаражатты жымқырған, деп хабарлайды Kapital.kz іскерлік ақпарат орталығы облыстық прокуратураға сілтеме жасап.

«Ауылшаруашылық өндірістік кооперативінің төрайымы «Ы» 2021 жылғы сәуірде ақпараттық жүйеге кооператив 2470 басты аналық ірі қара мен селекциялық жұмыстар жүргізу үшін 120 бас тұқымдық бұқа жалға алды деген жалған деректер енгізуді ұйымдастырды. Нәтижесінде мемлекеттік бюджеттен кооперативтің банктік шотына 24 700 000 теңге көлемінде субсидия аударылған. Алайда іс жүзінде селекциялық жұмыстар тек 18 тұқымдық бұқа мен 450 аналық малға жүргізілген, сондықтан заңсыз алынған субсидия көлемі 20 200 000 теңгені құрады», – деп хабарлады прокуратура.

Бұл факті бойынша прокуратура Қылмыстық кодекстің 190-бабының 4-бөлімінің 2-тармағы (аса ірі көлемде алаяқтық) бойынша алдын ала тергеуді бастады.

2026 жылғы 20 ақпандағы сот үкімімен ауылшаруашылық өндірістік кооперативінің төрайымы «Ы» аталған бап бойынша кінәлі деп танылып, 4 жылға бас бостандығынан айырылды, сондай-ақ коммерциялық ұйымдарда басшылық қызмет атқару құқығынан 5 жылға айырылды.

Заңсыз алынған қаражат толық көлемде өндіріліп, мемлекет кірісіне қайтарылды. Үкім әлі заңды күшіне енген жоқ.

Еске салсақ, бұған дейін Көкшетауда ауылшаруашылық саласындағы мемлекеттік субсидия ұрлығы бойынша үкім шыққан болатын. Онда сүт өндірісі мен оның өңделген өнімдерін арзандатуға арналған мемлекеттік қаражатты жымқырғандар жазаланған. Қарағандыдағы шаруа қожалығының жетекшілері 339 млн теңге субсидияны заңсыз пайдаланған. Түркістан облысында аудандық ветеринарлық қызметтің қызметкері мен ауыл тұрғыны жалған мал тіркеу арқылы субсидиялық қаржыны жымқырған. Ал Алматы облысында бір ауылшаруашылық кооперативінің басшысы 50 млн теңге субсидияны ұрлағаны үшін сотталған.