Жыл басынан бері Қазақстанда 163 мыңнан астам адам атаулы әлеуметтік көмек алды

Қазақстанда жыл басынан бері 30 мыңнан астам отбасы атаулы әлеуметтік көмек алды, деп хабарлайды Kapital.kz іскерлік ақпарат орталығы еңбек және халықты әлеуметтік қорғау министрлігінің баспасөз қызметіне сілтеме жасап.

«2026 жылғы 1 наурыздағы жағдай бойынша атаулы әлеуметтік көмек 30,3 мың отбасының 163,3 мың адамына 5,2 млрд теңге сомасында тағайындалды. Биыл бұл мақсатқа бюджеттен 62,7 млрд теңге қарастырылған», – делінген ақпаратта.

Бұған дейін хабарланғандай, атаулы әлеуметтік көмектің негізгі мақсаты – отбасының күрделі өмірлік жағдайдан шығуына көмектесу. Бұл үшін ақшалай төлемдер түрінде қолдау көрсетіліп, еңбекке қабілетті отбасы мүшелерін жұмыспен қамтуға жәрдемдесу шараларына тарту қарастырылған.

Атаулы әлеуметтік көмек аясында:

- табысы кедейлік шегінен аспайтын азаматтарға әлеуметтік көмек тоқсан сайын тағайындалады;

- аз қамтылған отбасылардағы 1 жастан 6 жасқа дейінгі балаларға ай сайын әр балаға 1,5 айлық есептік көрсеткіш (АЕК) мөлшерінде қосымша төлем беріледі. 1 наурыздағы жағдай бойынша бұл төлем 50,1 мың мектепке дейінгі жастағы балаға 618,1 млн теңге сомасында тағайындалған;

- еңбекке орналастыру, өз ісін ашуға ниетті отбасыларға гранттар беру, қажет болған жағдайда біліктілікті арттыру курстарына жіберу арқылы жұмыспен қамтуға жәрдемдесу шаралары іске асырылады.

Қазіргі уақытта қазақстандықтар атаулы әлеуметтік көмекті тағайындау үшін тұрғылықты жері бойынша мансап орталығына, ауылдық округ әкіміне жүгіну арқылы немесе электрондық үкімет порталы арқылы өтініш бере алады.

Еңбек министрлігінің мәліметінше, биыл Қазақстанда Отбасының цифрлық картасы арқылы 1218 адам жәрдемақы мен төлемдер алған.

Сонымен қатар атаулы әлеуметтік көмек алушылар санының 30%-ға төмендегені хабарланған. Бұдан бөлек, Қазақстанда атаулы әлеуметтік көмекті жасанды интеллект қолдану арқылы тағайындау технологиясын енгізу жоспарланып отыр.