Air Astana Медина мен Жиддаға репатриациялық рейстер орындауды жоспарлап отыр

Сауд Арабиясы мен Мысырдың авиациялық билік органдарынан ұшуға рұқсат алған жағдайда, Air Astana әуе компаниясы 2026 жылғы 3 наурызда Қазақстанның батыс өңірлерінен Мединаға және кері бағытта екі репатриациялық рейс, сондай-ақ Жиддаға және кері бағытта екі репатриациялық рейс орындауды жоспарлап отыр. Бұл туралы Азаматтық авиация комитеті хабарлады. Жолаушылардың ұшуы тек бұрын сатып алынған билеттер бойынша жүзеге асырылатыны нақтыланды.

«Авиациялық билік органдары жағдайдың дамуын мұқият қадағалауды жалғастырып, репатриациялық рейстерді орындауға жан-жақты жәрдем көрсетуде», — делінген хабарламада.

Сондай-ақ Flydubai әуе компаниясы Дубайдан Қазақстанға эвакуациялық рейстерді бастайтыны белгілі болды. 2026 жылғы 3 наурызға қараған түні FZ1533 Дубай-Алматы (170 орын) және FZ1395 Дубай-Астана (170 орын) рейстерін ұшыру жоспарланып отыр.

Қазақстанның Сыртқы істер министрлігінде шет мемлекеттердің құзыретті органдарымен қазақстандықтарды Ираннан көрші елдер арқылы эвакуациялауға жәрдемдесу жөнінде келісімдерге қол жеткізілгені хабарланды.

Армения тарапы арқылы эвакуациялау жағдайында Қазақстан азаматтарының иран-армян шекарасын кедергісіз кесіп өту мәселесі келісілді. Арменияның сыртқы саяси ведомствосының басшылығымен тұрақты байланыс ұсталып отыр.

Осындай жұмыс әзербайжан тарапымен де жүргізілді, олар эвакуация мәселелерінде жәрдем көрсетуге дайын екенін білдірді. Ел шекарасының құрлық учаскелерінде өткізу режимі шектеулі екенін ескере отырып, шекараны кесіп өту арнайы рұқсат алуды талап етеді.

Екі азаматтың өтінішіне сәйкес, Қазақстан Республикасының Әзербайжандағы Елшілігі Ираннан «Джульфа» (Нахчыван) бақылау-өткізу пункті арқылы шекарадан өтуге рұқсатты жедел түрде алды.

Түрікменстан да қазақстандық азаматтарды эвакуациялау үшін мемлекеттік шекарадан өтуді қамтамасыз етуге жәрдем көрсетуге дайын екенін растады.

Сонымен қатар жедел ақпараттандыруды қамтамасыз ету үшін СІМ заманауи цифрлық құралдарды, соның ішінде Kaspi инфрақұрылымын іске қосты. Компаниямен бірлесіп өңірдегі азаматтарға мобильді құрылғылар арқылы ресми ақпарат пен түсіндірмелерді уақтылы жеткізу жолға қойылды.

«Өңірдегі жағдай толық тұрақтанғанға дейін азаматтарды сабыр сақтауға, жергілікті билік органдарының талаптары мен ұсынымдарын сақтауға, қауіп-қатері жоғары аймақтардан аулақ болуға, сондай-ақ уақытша шектеулерге түсіністікпен қарауға шақырамыз. Қосымша ақпарат түскен сайын беріледі. Осыған байланысты СІМ мен ҚР шетелдегі мекемелерінің ресми хабарламаларын мұқият қадағалауды сұраймыз», – деп қорытындылады СІМ.