Қазақстанда алкоголь сатуға шектеу қойыла ма?

Премьер-министр Олжас Бектенов алкоголь өнімдерін сатуды шектеу, атап айтқанда, оларды сағат 20:00-ден кейін сатуға тыйым салу жөнінде ұсыныс жасаған ҚХП фракциясы депутаттарының сауалына жауап берді, деп хабарлайды Kapital.kz іскерлік ақпарат орталығының тілшісі.

Депутаттар өз сауалында ІІМ статистикасын келтірді. Ведомство деректеріне сәйкес, әрбір екінші кісі өлтіру, әрбір үшінші ұрлық, отбасылық-тұрмыстық сипаттағы құқықбұзушылықтардың едәуір бөлігі, сондай-ақ жол-көлік оқиғалары мен бұзақылық әрекеттер мас күйде жасалады.

Осыған байланысты халық қалаулылары мынадай ұсыныстар енгізді:

* балалар және білім беру ұйымдарынан 100 метр радиуста алкоголь сатуға тыйым салу;

* сауда нүктелерінің санын шектеу;

* өнімге цифрлық таңбалау енгізу;

* дүкендерде алкогольді сағат 20:00-ден кейін, ал дәмхана мен мейрамханаларда 22:00-ден кейін сатуға тыйым салу;

* онлайн сатуға тыйым салу;

* цифрлық және медиа форматтарды пайдалана отырып, жастар арасында алкоголизмнің алдын алу бағдарламаларын әзірлеу.

Үкімет алкоголь айналымын есепке алу қазірдің өзінде бақылау маркалары мен ақпараттық жүйелердің көмегімен жүргізіліп жатқанын атап өтті. Цифрлық таңбалауды енгізу бизнес дайындық деңгейі мен пилоттық жобалардың нәтижелерін ескере отырып, кезең-кезеңімен жүзеге асырылатын болады.

«Қазіргі уақытта жас ерекшелігіне, уақытқа және аумаққа қатысты шектеулер бөлігінде заңнаманың сақталуына мемлекеттік бақылауды күшейтуге бағытталған шаралар кешені іске асырылуда. Қоғамдық орындарда алкоголь ішуге тыйым салу, сондай-ақ оны өткізу уақыты мен шарттарына қойылатын шектеулер қолданыста. Сонымен қатар ойын-сауық мекемелерін қоса алғанда, нысандардың жұмыс режиміне қойылатын талаптарды нақтылау және нормативтік реттеуді жетілдіру бойынша жұмыстар жүргізілуде», – деп хабарлады премьер-министр алкогольді сату орындары мен уақытына шектеу қою жөніндегі депутаттардың ұсынысына берген жауабында.

Алкогольді қашықтан сату мәселесіне қатысты Үкімет басшысы бұл мәселе қолданыстағы шектеулер мен тәуекелдерді ескере отырып қарастырылып жатқанын айтты. Айналымды бақылау, жас ерекшелігіне қатысты шектеулерді сақтау және сатып алушыларды сәйкестендіру маңызды екені атап өтілді. Жұмыстың қорытындысы бойынша заңнаманы жетілдіруге бағытталған ұсыныстар әзірленетін болады.

Үкіметте қоғамдық денсаулықты қорғау және алкогольге байланысты құқықбұзушылықтардың алдын алу әлеуметтік, экономикалық және халықаралық факторларды ескере отырып, басым бағыт болып қала беретінін атап өтті.

Еске сала кетейік, 2026 жылғы 1 ақпаннан бастап Қазақстанда сыра мен сыра сусындарына цифрлық таңбалау енгізіле бастайды. Бірінші кезеңде кегтер мен бөтелкелердегі өнім таңбаланатын болады.

Бұған дейін ІІМ алкогольдің бөлшек саудасын тек арнайы сауда нүктелерінде немесе алкомаркеттерде жүзеге асыруды ұсынған болатын; алкоголь өнімдерін сатуға лицензия беру тәртібін қатаңдату және лицензиялар санына лимит енгізу; алкогольді онлайн сатуға толық тыйым салу мәселесі де көтерілген еді.