Алматыда алаяқтар жалған өмірді сақтандыру бағдарламалары арқылы пайда тапқан
Олардың алаяқтық әрекеттерінен 270 адам зардап шекті
Алматыда «Partners & Consultants» Өмірді сақтандыру» атты жалған жобаны ұйымдастырған алаяқтарға қатысты тергеу басталды, деп хабарлайды Kapital.kz іскерлік ақпарат орталығы Қаржылық мониторинг агенттігінің баспасөз қызметіне сілтеме жасап.
«Алматы қаласы бойынша ҚМА департаменті заңсыз инвестициялық қызмет саласындағы алаяқтық фактісі бойынша тергеу жүргізуде. 2013-2021 жылдар аралығында күдікті азаматтарды «Partners & Consultants» Өмірді сақтандыру» жобасы арқылы өмірді сақтандыру бағдарламалары мен жинақтаушы сақтандыру салымдарына инвестициялау деген желеумен олардың ақшалай қаражатын жымқыру схемасын ұйымдастырған», – деп хабарлайды Агенттік.
Ведомствоның мәліметінше, азаматтарды жылына 12%-ға дейін тұрақты табысқа кепілдік бере отырып, қаражатты бақылауындағы заңды тұлғалар – «Evroasia Global Investment» АҚ және «Evropa Investment» ЖШС-нің шоттарына аударуға көндірген. Жобаның сенімділігін растау үшін шын мәнінде жоқ халықаралық сақтандыру бағдарламалары мен сертификаттарға сілтемелер пайдаланылған.
Қаражат қолма-қол ақшасыз аударымдар арқылы қабылданып, кейін салымшыларға ұзақ мерзімді депозиттер мен инвестициялық міндеттемелердің бар екендігін көрсететін жалған құжаттар берілген. Нәтижесінде 270 жәбірленушіге 620 млн теңгеден астам сомаға залал келтірілген.
Алынған қаражат күдікті тарапынан жылжымайтын және жылжымалы мүлік сатып алуға жұмсалған, қазіргі уақытта аталған мүлікке билік етуге шектеу қойылған. Күдікті қамауға алынды.
ҚР ҚПК-нің 201-бабына сәйкес өзге ақпарат жария етуге жатпайды.
Бұған дейін алаяқтық микроқаржы ұйымы 47 мыңнан астам несиені жоғары пайыздық мөлшерлемемен бергені хабарланған болатын.
Астанада алаяқтар жалған промокодтар арқылы электроника сатып алып, оны үшінші тұлғаларға қайта сатқан.
Түркия зергерлік бұйымдармен алаяқтық жасады деген күдікке ілінген азаматшаны Қазақстанға экстрадициялады.
Сонымен қатар ҚР Ішкі істер министрлігі ескерту жасады — Telegram мессенджерінде тегін кітап ұсынамыз деп, алаяқтар зиянды файлдар таратуда.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
