ОСК жаңа Конституция жобасы бойынша референдумға арналған бюллетеньнің үлгісін бекітті

Қазақстанның Орталық сайлау комиссиясы жаңа Конституцияны қабылдау жөніндегі республикалық референдумда қолданылатын бюллетень жобасын ұсынды, деп хабарлайды Kapital.kz іскерлік ақпарат орталығының тілшісі.

ОСК мүшесі Михаил Бортниктің айтуынша, комиссия бюллетеньнің нысаны мен мәтінінің мемлекеттік және орыс тілдеріндегі жобасын дайындап қойған.

«Дауысқа шығарылатын сұрақтың тұжырымы: «2026 жылғы 12 ақпанда бұқаралық ақпарат құралдарында жарияланған жобасы бойынша Қазақстан Республикасының жаңа Конституциясын қабылдайсыз ба?». Жауап нұсқалары: «Иә, қабылдаймын» және «Жоқ, қабылдамаймын»», — деді ол.

Бюллетеньде бір сұрақ және екі баламалы жауап нұсқасы орналастырылады. Сайлаушылар таңдаған нұсқаның оң жағындағы бос шаршыға белгі қоюы тиіс. Тиісті алаңдағы кез келген белгі дауыс берушінің ұстанымын білдіреді.

Комиссия бланкілерді дайындау кезінде қорғаныстың кешенді шаралары қолданылатынын ерекше атап өтті. Бюллетеньдер офсеттік баспа технологияларын пайдалану арқылы, сондай-ақ алдын ала белгіленген түс, қаріп параметрлері және басқа да қорғаныс дәрежелерімен дайындалады, бұл қолдан жасау мүмкіндігін болдырмауға тиіс.

Таралым қосымша резервті ескере отырып қалыптастырылады. Облыстардың және Астана, Алматы, Шымкент қалалары әкімдіктерінің ұсынған мәліметіне сәйкес, сайлаушылар тізіміне 12 461 796 адам енгізілген. Көзделген бір пайыздық қорды ескере отырып, 12 586 413 бюллетень дайындалып, кейін олар ел бойынша учаскелік комиссияларға жіберіледі.

Бүгін сондай-ақ 15 наурыздағы референдумда қосымша қолжетімділік шаралары қамтамасыз етілетіні белгілі болды. Конституция жобасының аудионұсқасы барлық дауыс беру учаскелерінде қолжетімді болады.

Жаңа Конституция бойынша республикалық референдум 2026 жылғы 15 наурызға белгіленді. Конституцияға ұсынылып отырған өзгерістер Парламенттің өкілеттігін 1 шілдеден бастап тоқтатуды көздейді.

Конституциялық реформа жөніндегі комиссия Қазақстан Республикасының жаңа Конституциясы жобасының мәтінін жариялады.

Еске салайық, 2025 жылғы қыркүйекте Қазақстан халқына Жолдау барысында Қасым-Жомарт Тоқаев Парламентті бір палаталы етіп, оның құрамынан Сенатты алып тастау туралы ұсыныс айтқан еді. 2025 жылғы қазан айының басында ол «Парламенттік реформа жөніндегі жұмыс тобы туралы» өкімге қол қойды. Сол кезде парламенттік реформа үшін Қазақстан Конституциясына бірнеше түзету енгізу қажет екені белгілі болды. 2026 жылғы 20 қаңтарда өткен Ұлттық құрылтайдың V отырысында Мемлекет басшысы парламенттік реформа жөніндегі жұмыс тобының жинақталған ұсыныстарын таныстырды.