2025 жылы Қазақстанда 8,7 мыңнан астам еңбек құқықтарының бұзушылығы анықталды
51 мың жұмыскердің еңбек құқықтары қорғалды
2025 жылы қазақстандық мемлекеттік еңбек инспекторлары 8,7 мыңнан астам еңбек құқықтарының бұзушылығын анықтады, деп хабарлайды Kapital.kz іскерлік ақпарат орталығы Еңбек және халықты әлеуметтік қорғау министрлігінің баспасөз қызметіне сілтеме жасап.
«2025 жылы мемлекеттік еңбек инспекторлары республикадағы 629 кәсіпорында 11,9 мыңнан астам жұмыскерге 3,1 млрд теңгеден астам сомаға жалақы бойынша берешек бар екенін анықтады. Сонымен қатар, әртүрлі ұйымдарда жүргізілген тексерулер барысында 8,7 мыңнан астам еңбек құқықтарының бұзушылығы анықталды», – деп мәлімдеді Еңбек министрлігі.
Ақпаратта көрсетілгендей, жалақы бойынша берешек пен еңбек құқықтарының бұзушылықтары анықталған кәсіпорындардың басшыларына орындауға міндетті 4 245 нұсқама беріліп, 524,3 млн теңгеден астам сомаға айыппұл салынған.
Қабылданған шаралардың, соның ішінде жалақы бойынша берешекті өтеудің қатаң кестелері мен мерзімдерін белгілеудің нәтижесінде 11,8 мың жұмыскердің құқықтары қорғалды. Оларға 2,85 млрд теңге төленді.
«Еңбек заңнамасының сақталуын мемлекеттік бақылауды қамтамасыз ету мәселелері Қазақстан Республикасы Еңбек және халықты әлеуметтік қорғау министрлігінің ерекше бақылауында тұр. 2025 жылы мемлекеттік еңбек инспекторлары 6 599 тексеру жүргізді, оның барысында 8 720 бұзушылық анықталды, атап айтқанда, еңбек саласында – 7 089; еңбек қауіпсіздігі және еңбекті қорғау бойынша – 1 585; халықты жұмыспен қамту бойынша – 46. Қабылданған шаралардың нәтижесінде 51 мың жұмыскердің еңбек құқықтары қорғалды», – деп қорытындылады министрлікте.
Бұған дейін Еңбек және халықты әлеуметтік қорғау министрі Светлана Жақыпова мемлекеттік еңбек инспекциясын салалық ведомствоға беруді жоспарлап отырғандарын хабарлаған болатын. «Қазіргі уақытта біз мемлекеттік инспекторлар үшін мобильді қосымша әзірлеп жатырмыз. Мемлекеттік еңбек инспекциясы 2015 жылдары жергілікті атқарушы органдарға берілген болатын. Осыдан алшақтық пайда болды. Біз (заңнамаға түзетулер – Ред.) мемлекеттік еңбек инспекциясын қайтадан вертикаль жүйеге қайтару үшін бастама көтердік. Бұл – Халықаралық еңбек ұйымының ұсынымдары. Премьер-министр бұл ұсынысты қолдады. Енді Президент әкімшілігімен келісуді күтіп отырмыз. Одан кейін заң жобасымен мәжіліске шығуға дайынбыз», – деп түсіндірген министр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
