2026 жылдан бастап Қазақстанда медициналық қызметтің 200 түріне тарифтер жаңартылады

Денсаулық сақтау министрі Ақмарал Әлназарова Қазақстанда медицинадағы тарифтік саясатты жаңарту бойынша кешенді жұмыстар жалғасып жатқанын және 2026 жылдан бастап бірқатар медициналық қызметтердің құны айтарлықтай ұлғайтылатынын хабарлады, деп хабарлайды Kapital.kz іскерлік ақпарат орталығының тілшісі.

Депутат Павел Казанцев медициналық мекемелердің қаржылық тұрақтылығын қамтамасыз ету үшін тарифтерді қайта қарау туралы ресми сауал жолдағанын еске салып, бұл бағытта қандай қадамдар жасалғанын түсіндіруді сұрады.

Министр бұған жауап ретінде қызметтердің құны туралы мәселелер парламентте де, денсаулық сақтау ұйымдарының өздері тарапынан да бірнеше рет көтерілгенін атап өтті.

Ақмарал Әлназарованың айтуынша, қолданыстағы тарифтердің жұмыстың нақты өзіндік құнына сәйкес келмеуі айтарлықтай кредиторлық берешектің пайда болуына себеп болған.

«Былтыр Денсаулық сақтау министрлігі кешенді талдау жүргізіп, қайта қарауды қажет ететін, экономикалық тұрғыдан ең аз негізделген тарифтерді анықтады. Нәтижесінде, 2024 жылы босандыру қызметтерінің тарифтері 23 млрд теңге сомасына ұлғайтылды, бұл осы мекемелерге жыл қорытындысы бойынша көпжылдық кредиторлық берешекті өтеуге мүмкіндік берді. Бұдан басқа, бұл нәресте өлімін азайту түріндегі клиникалық әсерге әкелді», – деді ол.

Ведоство басшысы келесі жылы Міндетті әлеуметтік медициналық сақтандыру (МӘМС) аясында қосымша ресурстар қарастырылғанын да хабарлады.

«Келесі жылға 103 млрд теңге халық арасында ең көп сұранысқа ие медициналық қызметтердің іс жүзінде 200 түрін қайта қарауға бағытталады. Сонымен қатар, дәл осы бейіндер төмен тарифтерге байланысты жергілікті жерлерде жабылып қалған болатын, және біз тарифтерді қайта қарау жұмысы аясында осы бағытқа 103 млрд теңге бағыттаймыз. Шамамен 34 млрд теңге Тегін медициналық көмектің кепілдік берілген көлемі (ТМККК) есебінен, қалған сома МӘМС қаражаты есебінен болады. 2025 жылы біз тарифтерді көтердік және жалпы жаңа тарифтерді бекіттік, оның ішінде, айталық, протонды терапияға, адаптивті-сәулелік терапияға, КТ және МРТ бар. Мұның бәрі ең алдымен өңірлердегі халыққа көмек алуға мүмкіндік береді. Кезінде жабылып қалған 2700-ден астам тапшы төсек-орынды қалпына келтіру жоспарланып отыр», – деп түсіндірді ол.

Министрдің айтуынша, жаңартылған тарифтік кесте 2026 жылғы 1 қаңтардан бастап қолданыла бастайды.

Әлназарова инфекциялық қызмет бойынша қызметтер құны екі есеге, абдоминалды хирургия бойынша өсім шамамен 40%-ды, ал бірқатар терапевтік бағыттар бойынша 40%-дан 85%-ға дейін болатынын нақтылады.

Бұған дейін Денсаулық сақтау министрлігі 2027 жылға дейін стационарлар қызметтеріне арналған барлық тарифтерді қайта қарайтынын хабарланған болатын. Қазақстанда босану және акушерлік операцияларға арналған тарифтер көтерілді.