Абай облысында қаржы пирамидасы 1,5 мың қазақстандықтың қаражатын иемденген

Абай облысында ELL QUATY қаржы пирамидасы тұтыну кооперативі ретінде жұмыс істеген. Ұйым 1,5 мың азаматтың 6,8 млрд теңгесін иемденіп кеткен, деп хабарлайды Kapital.kz іскерлік ақпарат орталығы Қаржылық мониторинг агенттігінің баспасөз қызметіне сілтеме жасап.

«Абай облысы бойынша ҚМА департаменті тұтыну кооперативі атын бүркенген ELL QUATY қаржы пирамидасының қызметін тоқтатты. Ұйымдастырушылар азаматтарға HALYK QUATY кооперативіне кіруді ұсынып, кейін тұрғын үй мен көлікті пайызсыз бөліп төлеуге алу үшін пай жарналарын енгізуге үгіттеген. Өз қызметін halykquaty.kz сайты мен әлеуметтік желілер арқылы жарнамалап, «Әр отбасына – бақыт!» деген ұранды қолдана отырып, өзін «халық кооперативі» ретінде көрсеткен», – делінген ҚМА ақпаратында.

Айта кетерлігі, ұйым HALYK тауар белгісін заңсыз пайдаланғаны үшін әкімшілік жауапкершілікке тартылған. Осыдан кейін кооператив атауын ELL QUATY деп өзгерткен.

«Жаңа салымшыларды тарту үшін басшылық түрлі маркетингтік акцияларды, оның ішінде «Шуақты Түркия» туристік жолдамаларының ұтыс ойынын жүргізген. Қылмыстық жолмен алынған табыстарды заңдастыру мақсатында ұйымдастырушы өз атына QAZ INFO MARKET ЖШС тіркеп, салымшылардың қаражатын кәсіби, ғылыми және техникалық қызметтер үшін төлем ретінде осы шоттарға шығарып отырған. Аталған қызметтер іс жүзінде көрсетілмеген», – делінген ведомство мәліметінде.

Агенттік деректеріне сәйкес, осының салдарынан пирамидаға 1,5 мыңнан астам салымшы тартылып, олар жалпы 6,8 млрд теңге құйған.

Ұйымдастырушы қамауға алынды. Тергеу жалғасып жатыр. ҚР ҚПК-нің 201-бабына сәйкес өзге ақпарат жариялауға жатпайды.

Бұған дейін хабарланғандай, Қарағанды облысында қаржы пирамидасы қайырымдылық жобасы желеуімен салымшылардан қаражат жинаған. Ақмола облысында қаржы пирамидасын медициналық каннабис өндіру және дистрибуциялау жобасы ретінде бүркемелеген. Шымкентте Nazira Gold қаржы пирамидасын құру және оған басшылық жасау ісі бойынша үкім шығарылды. Бұл ұйым өз қызметін зергерлік бұйымдардың саудасын ұйымдастырушы ретінде көрсеткен. Алматыдағы қаржы пирамидасы қаражатты майнингке инвестиция ретінде жинаған.