• Басты бет
• Экономика
• Алматыда 2028 жылдың соңына дейін бес жұлдызды қонақүйлер мен шипажай кешені ашылады

Алматыда 2028 жылдың соңына дейін бес жұлдызды қонақүйлер мен шипажай кешені ашылады

Қаладағы қонақүй нөмірлерінің саны 6 мыңға артып, 18 мыңға жетпек

2028 жылға қарай Алматыдағы қонақүй нөмірлерінің санын 18 мыңға дейін жеткізу жоспарланып отыр. Бұл туралы Өңірлік коммуникациялар қызметінің алаңында Алматы қаласы туризм басқармасының басшысы Ғалия Тоқсейітова мәлімдеді, деп хабарлайды Kapital.kz іскерлік ақпарат орталығы Алматы әкімдігінің баспасөз қызметіне сілтеме жасап.

Оның айтуынша, бүгінде Алматыда қонақүй бизнесі саласында 81 инвестициялық жоба іске асырылып жатыр. Оның ішінде 8 бес жұлдызды және 9 төрт жұлдызды қонақүй, сондай-ақ басқа да заманауи орналастыру нысандары бар.

2028 жылға қарай мегаполистегі қонақүй нөмірлерінің қоры 12 мыңнан 18 мыңға дейін ұлғаяды. Бұл туристер мен ірі халықаралық іс-шараларға қатысушылар тарапынан өсіп келе жатқан сұранысты қамтамасыз етуге мүмкіндік береді. Алдағы жылдары Алматыда бірнеше халықаралық жоба іске қосылады. Атап айтқанда, 2027 жылы Hayat Meliora бес жұлдызды қонақүйі, ал 2028 жылдың соңына дейін Curio Collection by Hilton шипажай кешені мен The Veil Hotel бутик-қонақүйі ашылады.

Ғалия Тоқсейітованың айтуынша, қонақүй қорының ұлғаюы туристерді сапалы орналастырумен қатар, Алматының халықаралық форумдар, көрмелер, конференциялар және MICE-туризм бағытындағы өзге де іс-шараларды өткізу мүмкіндігін айтарлықтай кеңейтеді.

Маңызды бағыттардың бірі – тау туристік инфрақұрылымын дамыту. Қазір табиғи аумақтардың экологиялық құндылығын сақтай отырып, келушілер үшін қауіпсіз әрі жайлы жағдай жасауға ерекше көңіл бөлініп отыр.

Осы бағытта ұзындығы 8 шақырым болатын жаңа туристік маршрут – «Жапон соқпағы» жобасын іске асыру басталады. Құрылыс жұмыстары 2026–2027 жылдарға жоспарланған. Тау бағыттарын кешенді абаттандыру аясында навигациялық көрсеткіштер, демалыс орындары, бақылау алаңдары, орындықтар, беседкалар, ақпараттық стендтер, кіреберіс аймақтары және экологиялық туризм талаптарына сай басқа да нысандар орнатылады.

Сонымен қатар биыл жазда жаңа «Алма-Арасан» визит-орталығының құрылысы басталады. Жоба аясында заманауи туристік орталық салынып, оған іргелес аумақ абаттандырылады, навигация жүйесі дамытылып, келушілерге арналған жайлы қоғамдық кеңістіктер жасалады.

Ғалия Тоқсейітованың айтуынша, бұл жобалар тау аумақтарына баруды қауіпсіз әрі қолайлы етіп, табиғи ландшафттарға түсетін антропогендік жүктемені азайтуға және халықаралық деңгейдегі заманауи туристік инфрақұрылым қалыптастыруға мүмкіндік береді.

Қонақүй желісі мен табиғи туристік нысандарды кешенді дамыту Алматының туристік саласының одан әрі өркендеуінің негізгі факторларының бірі саналады және қаланың Қазақстан мен Орталық Азиядағы жетекші туристік орталық ретіндегі мәртебесін нығайтады.

Бұған дейін Алматының ел бойынша қонақүйлердің жүктемесі ең жоғары қала екені хабарланған болатын. Оңтүстік астанаға ең көп келетін туристер – Ресей, Қытай және Үндістан азаматтары.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз