Қасым-Жомарт Тоқаев Euronews директорлар кеңесінің төрағасымен кездесті
Тараптар ынтымақтастықты кеңейту және Қазақстанның жетістіктерін халықаралық аудиторияға таныту мәселелерін талқылады
Президент Қасым-Жомарт Тоқаев Euronews директорлар кеңесінің төрағасы Педро Варгас Давидті қабылдады, деп хабарлайды Kapital.kz іскерлік ақпарат орталығы Ақорданың баспасөз қызметіне сілтеме жасап.
Кездесу барысында әлемдегі жетекші телеарналардың бірімен ынтымақтастықты кеңейту перспективалары талқыланды.
Мемлекет басшысы Euronews объективті ақпарат таратудағы беделінің арқасында әлемдік медиа кеңістікте ерекше орын алатынын атап өтті.
Президенттің айтуынша, 2024 жылы Астанада өңірлік кеңсесі ашылғаннан бері Euronews Қазақстан мен Орталық Азиядағы саяси, экономикалық және мәдени оқиғаларды белсенді түрде жариялай бастады.
Қасым-Жомарт Тоқаев Euronews телеарнасының қазақ тілінде хабар тарата бастағанын құптап, оны өзара тиімді ынтымақтастықтың жарқын көрінісі деп атады.
Педро Варгас Давидтің айтуынша, қазақ тілі Euronews медиажелісіндегі Орталық Азия халықтарының алғашқы тілі болады.
Сондай-ақ Euronews басшысы қазақстандықтарды жаңа Ата заңның қабылдануымен құттықтап, онда бекітілген қағидаттар мен құндылықтар ел басшылығының қуатты әрі прогрессивті мемлекет құруға ұмтылысын көрсететінін айтты.
Кездесуде тараптар Қазақстан президентінің жуырдағы Брюссельге жасаған ресми сапарының қорытындылары жөнінде де пікір алмасты. Педро Варгас Давидтің айтуынша, сапар қарсаңында Euronews сайтында жарияланған Қасым-Жомарт Тоқаевтың Астана мен Еуропалық одақ арасындағы кеңейтілген стратегиялық әріптестіктің перспективалары туралы мақаласы еуропалық аудитория тарапынан оң бағаланған.
Сондай-ақ еуропалық сарапшылардың пікірінше, Қазақстан мен Еуропалық одақ арасындағы қарым-қатынас қарқынды дамып, ұзақ мерзімді әрі нәтижелі ынтымақтастықтың жаңа деңгейіне көтеріліп келеді.
Әңгіме барысында өңірді жаһандық ақпараттық кеңістікке ықпалдастыруға және Қазақстанның жетістіктерін әлем жұртшылығына кеңінен танытуға мүмкіндік беретін бірлескен бастамаларды іске асыру мәселелері қаралды.
Еске салайық, Euronews 2024 жылдың қараша айында «Астана» халықаралық қаржы орталығында өз өкілдігін ашты. Ал сол жылдың тамыз айында Брюссельде Астанада Euronews-тің Орталық Азия бойынша өңірлік өкілдігін ашу туралы келісімге қол қойылған болатын.
Euronews – әлемдегі оқиғаларды 13 тілде тәулік бойы тарататын еуропалық ақпараттық телеарна. Ол 1993 жылдың қаңтарында құрылған, штаб-пәтері Францияның Лион қаласында орналасқан.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
