Қазақстан тауарлы газ өндіруді 30%-ға арттыруды жоспарлап отыр
Өсім Қашаған мен Қарашығанақтағы газ өңдеу қуаттарын іске қосу есебінен қамтамасыз етіледі.
Қазақстанда тауарлы газдың ресурс базасын ұлғайту үшін екі негізгі құжат бекітілді: олар – Қазақстан Республикасының газ саласын дамытудың 2025–2029 жылдарға арналған кешенді жоспары және Көмірсутектердің жаңа перспективалы кен орындарын 2035 жылға дейін игеру жоспары. Бұл туралы Үкімет отырысында Энергетика министрі Ерлан Ақкенженов мәлімдеді, деп хабарлайды Kapital.kz іскерлік ақпарат орталығының тілшісі.
«Жоспарды жүзеге асыру аясында 30 жер қойнауы учаскесі қарастырылған. Бүгінгі таңда QazaqGaz компаниясымен тоғыз келісімшарт жасалды, оның ішінде алты жоба барлау сатысында, ал үшеуі өндіру кезеңінде тұр. 2023 пен 2025 жылдар аралығында «QazaqGaz» және «ҚазМұнайГаз» ұлттық компаниялары Анабай, Барханная, Рожковское және Батыс Прорва кен орындарын өндірістік игеруге қосты. 2027 жылы Батыс Прорва кен орнының екінші іске қосу кешенін, сондай-ақ Малдыбай, Придорожное және Үріхтау кен орындарын пайдалануға беру жоспарланып отыр. Елді газбен қамту шаралары 2035 жылға дейінгі Газдандырудың бас схемасы аясында жүргізіліп жатыр. 2026 жылғы 1 қаңтардағы жағдай бойынша елді газдандыру деңгейі 64,2%-ға жетті, 13,1 миллион адам табиғи газбен қамтылды», - деді министр.
Барлығы 40 жобаны жүзеге асыру көзделген, оның ішінде жетеуі — жалғасып жатқан (өтпелі), ал 33-і — жаңа жоба.
Ол солтүстік өңірлерді газбен қамтамасыз ету үшін 2025 жылғы 9 қазанда Қазақстан Үкіметі мен «Газпром» ЖАҚ арасында «Есіл – Астана» магистральдық газ құбырын салу жобасын жүзеге асыру туралы меморандумға қол қойылғанын еске салды.
«Жобаны іске асыру Астана, Көкшетау және Петропавл қалаларын газбен үздіксіз қамтамасыз етуге, сондай-ақ еліміздің солтүстік аймақтарына табиғи газ жеткізу бағыттарын әртараптандыруға мүмкіндік береді. Жергілікті атқарушы органдар тарапынан жүзеге асырылып жатқан газдандыру жобалары уақтылы қаржыландырылса және «Есіл – Астана» магистральдық газ құбыры жобасы сәтті іске асса, елді газдандыру деңгейін 2035 жылға қарай 64,2%-дан 80%-ға дейін арттыру жоспарлануда», - деді ол.
Газ транзиті 2025 жылдың қорытындысы бойынша 70,4 млрд м³ құрады, 2026 жылға арналған жоспар – 73,3 млрд м³, ал 2026 жылдың бес айындағы нақты көрсеткіш – 30,3 млрд м³ болды.
«Болжамды көрсеткіштерге сәйкес, тауарлы газ өндіру көлемі 2025 жылғы 27,4 млрд м³-ден 2032 жылға қарай 35,5 млрд м³-ге дейін ұлғаяды, бұл 2025 жылғы нақты көрсеткіштен 29,6%-ға жоғары. Бұл өсім тауарлы газ өндірісінің көлемін арттыру жобаларын жүзеге асыру, соның ішінде Қашаған мен Қарашығанақ кен орындарында газ өңдеу қуаттарын іске қосу есебінен қамтамасыз етіледі», - деді Ерлан Ақкенженов.
Қосымша перспективалы тауарлы газ көлемі 2027 – 2030 жылдары – 1,6 млрд м³; 2031 жылы – 2,3 млрд м³; 2032 жылы – 6,6 млрд м³ болады деп күтіледі.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
