Air Tengri компаниясының тең иесі Нұрлан Қаныбеков AIFC алаңында жаңа холдинг құрды
NK Global Ltd компаниясы 3 шілдеде тіркелді, оның қызмет бағыты – холдингтік қызмет
Air Tengri әуе компаниясының тең иесі Нұрлан Қаныбеков «Астана» халықаралық қаржы орталығының (AIFC) алаңында NK Global Ltd атты жаңа компанияны тіркеді, деп хабарлайды Kapital.kz іскерлік ақпарат орталығы AFSA ақпаратына сілтеме жасап.
Компания 2026 жылғы 3 шілдеде Астанада ресми тіркелген. Қызмет түрі холдингтік қызмет ретінде көрсетілген. Компанияның бас директоры (CEO) – Рахымжан Әсембек. LinkedIn желісіндегі мәліметке сәйкес, ол 2026 жылдың наурыз айынан бері Нұрлан Қаныбековтің активтерінің бірі – Air Tengri әуе компаниясында жетекші жоба менеджері қызметін атқарады.
Kompra сервисінің дерегінше, кәсіпкер Нұрлан Қаныбеков Air Tengri әуе компаниясының тең иесі болып Sky Logistics Services ЖШС арқылы қатысады. Жобадағы оның серіктесі – Талғат Әсембек.
Air Tengri шағын авиация саласында жұмыс істейді. Kompra мәліметінше, компания 2025 жылдың сәуірінде құрылған. Сол жылы оның құрамына Нұрлан Қаныбеков пен Талғат Әсембек иелік еткен «Еуро-Азия Эйр» әуе компаниясы қосылған.
Air Tengri компаниясының сайтындағы ақпаратқа сәйкес, әуе тасымалдаушы IOGP сертификатынан және Shell Aircraft Limited аудитінен өткен. Компания жеке ұшақтармен чартерлік рейстерді, корпоративтік және VIP-тасымалдарды жүзеге асырады, сондай-ақ теңіздегі мұнай-газ платформаларына авиациялық қызмет көрсетеді. Әуе паркінде Embraer Legacy 650 үлгісіндегі жеті бизнес-джет бар.
Нұрлан Қаныбеков «Petro Asia» АҚ арқылы «САУТС-ОЙЛ» мұнай-газ компаниясының да тең иесі болып табылады. Компанияның бас кеңсесі Шымкентте орналасқан. Ол 1999 жылы құрылып, Қызылорда және Ұлытау облыстарында көмірсутек шикізатын барлау және өндірумен айналысады. Компания жұмыс істей бастағаннан бері 9,371 млн тонна мұнай мен 745,250 млн текше метр газ өндіріп, 389 ұңғыма бұрғылаған.
Компанияның сайтындағы мәліметке сәйкес, «САУТС-ОЙЛ» кәсіпорны «Petro Asia» жарғылық капиталының басым үлесіне иелік ететін «Онтүстік» қаржы-өнеркәсіптік тобының қатысуымен құрылған. Ал «Онтүстік» ҚӨТ-ның иесі – кәсіпкер Серікжан Сейтжановтың отбасы.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
