АХҚО-да қазақстандық астықты токенизациялау жобасы іске қосылады
Фермерлер цифрлық токендерді қаржыландыру алу үшін кепіл ретінде пайдалана алады
АХҚО-ның Қаржылық қызметтерді реттеу комитеті (AFSA) Commodity Chain Ltd. компаниясына «реттеушілік құмсалғыш» аясында қызмет жүргізуге лицензия берді. Жоба нақты активтерді цифрландыруға мүмкіндік береді, ал оның алғашқы кезеңі элеваторларда сақталған астықты токенизациялауға бағытталады. Фермерлер мұндай цифрлық токендерді қысқа мерзімді қаржыландыру алу үшін кепіл ретінде пайдалана алады. Көктемде нарықтағы баға өскен кезде астық немесе токендер сатылып, смарт-келісімшарттар қарызды автоматты түрде өтеп, қалған пайданы фермердің шотына аударады. Ал өнім көлемі мен сапасын нақты уақыт режимінде IoT-датчиктері бақылап отырады, деп хабарлайды Kapital.kz іскерлік ақпарат орталығы АХҚО баспасөз қызметіне сілтеме жасап.
«AFSA Commodity Chain Ltd. компаниясына АХҚО-ның реттелетін ортасы аясында токенизацияланған нақты активтердің айналымы бойынша қызметті жүзеге асыруға лицензия берді. Бұл лицензия нақты әлем активтерін (RWA), оның ішінде ауыл шаруашылығы өнімдерін токенизациялау бойынша шешімдерді әзірлеуге және кейіннен енгізуге, сондай-ақ оларды заманауи цифрлық технологиялар мен АХҚО-ның қаржылық инфрақұрылымын пайдалана отырып, АХҚО лицензиялаған платформада айналымға шығаруға мүмкіндік береді. Жобаның алғашқы бағыты жаңғыртылған элеваторларда сақталған астықты қоса алғанда, ауыл шаруашылығы өнімдерін токенизациялау болады», – деп түсіндірді АХҚО.
Жоба IoT технологиялары мен жасанды интеллект негізіндегі шешімдерді пайдалана отырып активтерді токенизациялау инфрақұрылымын құруды, сондай-ақ олардың лицензияланған платформада айналымын ұйымдастыруды көздейді. Болашақта жобаны өзге өңірлерге, шетелдік нарықтарға және активтердің жаңа түрлеріне кеңейту жоспарланып отыр.
«Токенизация – бұл жай ғана жаңа қаржылық технология емес. Бұл цифрлық құралды экономикадағы нақты активпен байланыстыру тәсілі. Бұл жағдайда сөз сақталатын, бақыланатын және цифрлық қаржы құралы түрінде ұсынылатын астық туралы болып отыр. Мұндай модель халықаралық реттеуді, блокчейнді, IoT-бақылауды және аграрлық сектордың практикалық қажеттіліктерін біріктіреді», – деді АХҚО әкімшілігінің инновациялар жөніндегі бас директоры Талғат Аманбаев.
Платформаның негізі IoT технологияларымен біріктірілген жеке блокчейн инфрақұрылымы болады. Бұл нақты әлем активтерін (RWA) ашық токенизациялауды, олардың шығарылуы мен айналымының қадағалануын, сондай-ақ цифрлық қаржы құралдарының элеваторда сақталған нақты актив – астықпен байланысын қамтамасыз етеді.
Токенизацияның негізгі элементі «ашық элеватор» жүйесі болады. Температура мен ылғалдылықты бақылайтын датчиктер, автоматтандырылған таразылар астықтың көлемі мен жай-күйін нақты уақыт режимінде бақылауға мүмкіндік береді.
Токендер лицензияланған сауда алаңында айналымға шығарылады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
