«Қазатомөнеркәсіп» акционерлері 335 млрд теңгеден астам дивиденд төлеуді мақұлдады
Бір акцияға шаққандағы төлем 1 292 теңгеден асады
«Қазатомөнеркәсіп» ҰАК акционерлері 2025 жылға арналған дивиденд мөлшерін бір жай акция үшін 1 292,27 теңге көлемінде бекітті. Айта кетейік, бір жаһандық депозитарлық қолхат (GDR) бір жай акцияға тең, деп хабарлайды Kapital.kz іскерлік ақпарат орталығы компания деректеріне сілтеме жасап.
«Акционерлердің жылдық жалпы жиналысы директорлар кеңесінің ұсынымдары негізінде 335,2 млрд теңгені дивиденд төлеуге бағыттау туралы шешім қабылдады. Бұл топтың еркін ақша ағынының 75%-ына сәйкес келеді. Дивидендтерді төлеу 2026 жылғы 28 шілдеде басталады», – делінген компания хабарламасында.
Жай акциялар бойынша дивидендтер теңгемен, ал GDR бойынша – Citibank, N.A. депозитарий банкіне қаражат аударылған күнгі Ұлттық банктің бағамы бойынша теңгедегі баламалы сомада доллармен төленеді.
Еске салайық, 2024 жылдың қорытындысы бойынша компания 327,8 млрд теңге көлемінде дивиденд төлеген болатын. Бір жай акцияға шаққандағы дивиденд мөлшері де төмен болды – 1 264,12 теңге.
«Қазатомөнеркәсіп» ҰАК – әлемдегі ең ірі уран өндіруші компания. Компания еншілес ұйымдарымен және өзге де байланысты құрылымдарымен бірге 14 уран өндіру активіне біріктірілген 27 кен орнын игеріп жатыр. Барлық уран өндіруші кәсіпорындар Қазақстан аумағында орналасқан.
«Қазатомөнеркәсіптің» бағалы қағаздары Лондон қор биржасында және Astana International Exchange биржасында орналастырылған. Сонымен қатар компания Қазақстан қор биржасында (KASE) листингтен өткен. Топтың негізгі клиенттері – әлем бойынша атом электр станцияларының операторлары. Компания өз өнімін Азия, Еуропа елдеріне және АҚШ-қа экспорттайды.
2025-2034 жылдарға арналған даму стратегиясына сәйкес, «Қазатомөнеркәсіп» жаңа нарықтарға шығуды жоспарлап отыр. 2025 жылы еуропалық Axpo Power AG (Швейцария), ČEZ Group (Чехия) энергетикалық компанияларымен, сондай-ақ жапониялық Kansai Electric Power Co., Inc. компаниясымен уран жеткізу туралы келісімшарттарға қол қойылды. Үндістанға табиғи уран концентраттарын жеткізу бойынша ұзақмерзімді келісімшарт жасау жұмыстары жалғасып жатыр.
Ұлттық компанияның негізгі акционерлері: «Самұрық-Қазына» ҰӘҚ – 62,99% және Қазақстан Республикасының Қаржы министрлігі – шамамен 12,01%. Министрлік бұл үлеске ҚР Ұлттық қоры арқылы иелік етеді. Қалған 25% акция қор биржаларында еркін айналымда (free-float) жүр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
