Kaspi.kz Украинадағы Portmone Group төлем компаниясын сатты
Сатып алушы мен мәміле құны жарияланған жоқ
Kaspi.kz финтех-холдингі Украинада жұмыс істейтін Portmone Group төлем компаниясын сатты. Бұл туралы компанияның 2025 жылға арналған қаржылық есебіне сілтеме жасап, Kapital.kz іскерлік ақпарат орталығы хабарлайды.
Құжатқа сәйкес, 2025 жылғы 10 қыркүйекте Kaspi.kz тобы Portmone Group-ты өзіне қатысы жоқ компанияға сату туралы келісімге қол қойған. Мәміле компания қызметінің ірі бағытына жатпайды. Сонымен қатар, таза активтер алынған өтемақының әділ құнына шамалас болғандықтан, топ бұл келісім бойынша айтарлықтай пайда немесе шығынды тіркемеген.
Portmone Group-ты кім және қандай сомаға сатып алғаны нақтыланбады.
Айта кетейік, Kaspi.kz бұл компанияның 100% үлесін 2021 жылы өзінің еншілес ұйымы Kaspi Pay арқылы сатып алған еді. Сол кездегі мәміле құны жария етілмеген.
Portmone – 2002 жылдан бері жұмыс істеп келе жатқан банкаралық төлем жүйесі және Украина нарығындағы ірі ойыншылардың бірі. Бұған дейін Portmone Group бақылау пакеті Dragon Capital инвестициялық компаниясы құрған Europe Virgin Fund қорына тиесілі болған.
Kaspi.kz холдингі онлайн төлемдер, P2P-аударымдар, жеке қаржыны басқару және онлайн сауда сервистерін біріктіреді. Топ құрамына Kaspi Bank, Kaspi Pay, Kaspi Магазин, Kaspi Travel және басқа да компаниялар кіреді.
2026 жылғы 1 қаңтардағы деректер бойынша, компанияның ірі акционерлері қатарында Baring Funds (22,15%), Михаил Ломтадзе (21,53%) және Вячеслав Ким (19,78%) бар.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
