Қазақстандағы инвестиция көлемі бір жылда 13%-ға артты

2025 жылдың қорытындысы бойынша Қазақстанда негізгі капиталға салынған инвестиция көлемі 22,7 трлн теңгені құрады. Бұл 2024 жылмен салыстырғанда 13%-ға жоғары (19,5 трлн теңге). Инвестициялық белсенділіктің артуы экономиканың бірнеше негізгі секторында байқалды, деп хабарлайды Kapital.kz іскерлік ақпарат орталығы.

Ұлттық экономика министрлігі мәліметінше, ең жоғары өсім қаржы және сақтандыру қызметі саласында тіркелді. Бұл сектордағы инвестиция көлемі 88,4%-ға өсіп, 313,5 млрд теңгеге жетті.

Сонымен қатар бірқатар салаларда да айтарлықтай өсім байқалады. Атап айтқанда электр энергиясымен, газбен, бумен және ыстық сумен жабдықтау – 53,1%, ауыл шаруашылығы – 53%, өңдеу өнеркәсібі – 30,1%, ақпарат және байланыс – 13,4%, білім беру – 9,2%, сондай-ақ көлік және қоймалау – 9%.

Инвестициялық белсенділіктің артуына шетелдік капитал ағыны да әсер етті. 2025 жылдың алғашқы тоғыз айында Қазақстанға тартылған тікелей шетелдік инвестициялар көлемі 14,9 млрд долларды құрады. Бұл 2024 жылдың сәйкес кезеңімен салыстырғанда 10,9%-ға көп (13,4 млрд доллар).

Инвестициялық ахуалды жақсарту мақсатында Үкімет 2030 жылға дейінгі инвестициялық саясат тұжырымдамасын бекітті. Құжат жаңа жаһандық экономикалық үрдістерді ескере отырып, инвестиция тарту жүйесінің тиімділігін арттыруға бағытталған. Негізгі басымдық – жоғары қосылған құны бар өндірістерді дамыту және экономиканың шикізаттық емес секторына инвестиция тарту.

Қазіргі уақытта елде инвестиция тартудың үш деңгейлі жүйесі – сыртқы, орталық және өңірлік деңгей жұмыс істейді. Инвесторлармен жұмыс әлеуетті серіктестерді іздеуден бастап жобаларды іске асыру мен кейінгі сүйемелдеуге дейінгі кешенді тәсілмен жүргізіледі.

Инвестициялық әлеуетті халықаралық деңгейде ілгерілету үшін Kazakh Invest ұлттық компаниясының шетелдегі өкілдіктер желісін кеңейту жоспарланып отыр. Сонымен қатар басым инвестициялық жобаларды іріктеу және құрылымдау үшін Бәйтерек ұлттық басқарушы холдингі жанынан арнайы Investment Board құрылды.

Инвесторларды кешенді қолдау үшін негізгі даму институттарын біріктіретін Kazakhstan Investment House бірыңғай орталығын құру жоспарланған. Ол «бір терезе» қағидаты бойынша инвестициялық рәсімдерді жедел әрі ашық жүргізуге мүмкіндік береді.

Өңірлерде де инвестиция тарту жұмысы күшейтіледі. Инвестициялық штабтардың қызметі кеңейтіліп, жобаларды дайындау сапасын арттыру және қажетті инфрақұрылымды дамыту көзделген. Әлеуметтік-кәсіпкерлік корпорациялар өңірлік даму институттары ретінде салалық кластерлерді қалыптастыруға бағытталады.

Сонымен қатар инвесторлардың құқықтарын қорғау тетіктері күшейтіледі. Инвестициялық омбудсменнің функциясын Қазақстан Республикасының Бас прокуратурасы атқарады. «Жасыл дәліз» тетігі енгізіліп, мемлекеттік қызметтерді жедел алу мүмкіндігі қарастырылады. Өңірлерде инвестициялық жобаларды құқықтық сүйемелдеумен айналысатын арнайы инвестициялық прокурорлар тағайындалады.