Наурыз айында Ұлттық қордан бюджетке трансферттер үшін $500 млн-ға дейін валюта сатылуы мүмкін

2026 жылғы ақпан айының қорытындысы бойынша теңге бағамы 0,7%-ға нығайып, доллар бағамы 497,69 теңгені құрады. Қазақстан қор биржасындағы орташа тәуліктік сауда көлемі ай ішінде 306 млн доллардан 335 млн долларға өсті. Жалпы сауда көлемі 6,7 млрд долларды құрады, деп хабарлайды Kapital.kz іскерлік ақпарат орталығының тілшісі Ұлттық банк баспасөз қызметіне сілтеме жасап.

Ақпан айында Ұлттық қордан валюта сатылымы 400 млн долларды құрап, республикалық бюджетке трансферттерді бөлуге мүмкіндік берді. Ұлттық қордан сатылым көлемі жалпы сауда көлемінің 6%-ын құрады және тәулігіне 20 млн доллардан аспады.

«Үкіметтің алдын ала болжамдық өтініштерін және күтілетін фискалдық түсімдерді ескере отырып, наурыз айында республикалық бюджетке трансферттерді бөлу үшін Ұлттық банк Ұлттық қордан 400-500 млн доллар көлемінде валюта сатылымын күтіп отыр. Тұрақтандыру операциялары шеңберінде ақпанда 350 млрд теңге бейтараптандырылды. Наурызда осы мақсатта 350 млрд теңгеге тең валюта сатылымы күтілуде», – делінген хабарламада.

Ақпанда Ұлттық банк валюта интервенцияларын жүргізген жоқ.

Ақпан айының қорытындысы бойынша жартылай мемлекеттік сектор субъектілерінің міндетті валюта сатылымы нормасы шеңберіндегі валюта түсімінің сатылымы шамамен 284 млн долларды құрады.

Бұрын жарияланған жоспарға сәйкес, БЖЗҚ валюталық активтерінің үлесі 40%-тан асатынын ескере отырып, Ұлттық банк ақпан айында зейнетақы активтерінің инвестициялық портфеліне доллар сатып алмаған. Наурыз айында да валюта сатып алу жоспарланбаған.

Естеріңізге сала кетейік, 2025 жылы Ұлттық банк валюта нарығында 15,2 млрд долларды айырбастады. Ұлттық қордан трансферттерге 8,2 млрд доллар, ал алтын сатып алу операциялары бойынша 7 млрд доллар жұмсалды. 2025 жылдың қорытындысы бойынша теңге бағамы 3,7%-ға нығайып, доллар бағамы 525,10 теңгеден 505,73 теңгеге жетті.

2026 жылдың басынан бастап айырбас бағамын нығайту тенденциясы сақталып отыр және ақпанда айтарлықтай күшейді. Осы жылдың басынан бері теңге 3,3%-ға нығайып, доллар бағамы 489,28 теңгеге жетті.