Өнеркәсіпті дамыту қоры екі жылға дивиденд төлеуді жоспарлап отыр

«Өнеркәсіпті дамыту қоры» АҚ 2021 және 2022 жылдар бойынша қарапайым акцияларға дивиденд төлейтін болады, деп хабарлайды Kapital.kz іскерлік ақпарат орталығының тілшісі Қазақстан қор биржасы (KASE) деректеріне сілтеме жасап.

«1) Дивиденд төлеу күні: 2026 жылғы 20 ақпан;

- төленуге тиіс дивиденд сомасы: 4 100 100 665,96 (төрт миллиард жүз миллион жүз мың алты жүз алпыс бес) теңге 96 тиын;

- дивиденд төленетін кезең: 2021 жыл;

- бір қарапайым акцияға есептелген дивиденд мөлшері: 7 060,44 (жеті мың алпыс) теңге 44 тиын;

2) Дивиденд төлеу күні: 2026 жылғы 20 ақпан;

- төленуге тиіс дивиденд сомасы: 11 196 455 007,20 (он бір миллиард жүз тоқсан алты миллион төрт жүз елу бес мың жеті) теңге 20 тиын;

- дивиденд төленетін кезең: 2022 жыл;

- бір қарапайым акцияға есептелген дивиденд мөлшері: 18 874,20 (он сегіз мың сегіз жүз жетпіс төрт) теңге 20 тиын», – деп көрсетілген биржаның хабарламасында.

Екі жағдайда да сыйақы төлеу үшін реестрді тіркеу қарастырылмағаны атап өтілген.

Қордың сайтында көрсетілгендей, 2025 жылға дейінгі аудиттелмеген деректер бойынша 2021 жылдан бастап Қор арқылы экономикаға салынған инвестициялар 2 334,7 млрд теңгені құрады, оның ішінде 2025 жылға 479,7 млрд теңге. Қордың жарғылық капиталы 2021 жылдың басынан 2025 жылға дейін 104,4 млрд теңгеден 488,5 млрд теңгеге өскен. Ал активтері 2021 жылдан 2025 жылға дейін 889,5 млрд теңгеден 3 003,8 млрд теңгеге жеткен. Қордың лизингтік және кредиттік портфелі 2021 жылдың басынан 2025 жылға дейін 624,1 млрд теңгеден 2 447 млрд теңгеге өскен. Жобаларға 2 334,6 млрд теңге қаржыландырылды, оның ішінде 2025 жылдың үшінші тоқсаны бойынша 553,6 млрд теңге. 2025 жылдың үшінші тоқсаны бойынша таза табыс 45,75 млрд теңгені құрады.

Өнеркәсіпті дамыту қоры Қазақстан даму банкіне тәуелді ұйым болып табылады және «Бәйтерек» Ұлттық холдингінің құрылымына кіреді. Қор 2020 жылғы 11 мамырда Президент тапсырмасымен ұлттық экономиканың өнеркәсіптік әлеуетін дамыту үшін құрылып, Қазақстан Республикасы Үкіметінің 2020 жылғы 18 тамыздағы № 521 «Өнеркәсіпті дамыту қорын құру туралы» қаулысымен рәсімделген. 2021 жылғы 27 желтоқсанда Қазақстан Республикасының «Өнеркәсіптік саясат туралы» заңы (№ 86-VII ЗРК) қабылданып, қордың мақсаттары, міндеттері және мандаты бекітілген (15-бап). Бұған дейін қор 2005 жылғы 6 қыркүйекте құрылған «БРК-Лизинг» АҚ ретінде жұмыс істеген, ол Қазақстан даму банкі ұсынған инвестициялық жобаларды қаржыландыру құралдарын кеңейту үшін жасалған. 2020 жылғы 21 қыркүйекте БРК директорлар кеңесі «БРК-Лизинг» АҚ-тың фирмалық атауын «Өнеркәсіпті дамыту қоры» АҚ деп өзгерту туралы шешім қабылдаған.