Қазақстандық бизнес OPEC қорының қаржыландыруына қол жеткізе алады

Қазақстан Парламенті Үкімет пен OPEC Халықаралық даму қоры арасындағы негіздемелік келісімді мақұлдау рәсімін аяқтады. Бұл құжат отандық компанияларға ауқымды көлемдегі сыртқы қаржыландыруға қол жеткізуге жол ашады. Алдағы жылдары бизнес инвестициялық жобаларды іске асыру үшін 400 млрд теңгеге дейі қаржы тарта алады деп күтілуде, деп хабарлайды Kapital.kz іскерлік ақпарат орталығының тілшісі.

Келісімге 2024 жылғы 4 қыркүйекте Астанада қол қойылды және ол қазақстандық жекеменшік компаниялардың OPEC қорының қаржылық құралдарымен өзара іс-қимыл тетіктерін жеңілдетуге бағытталған. Ратификациядан кейін құжат мемлекеттің қосымша араласуынсыз бизнестің қор бағдарламаларына тікелей қатысуы үшін институционалдық негіз қалыптастырады.

Әділет вице-министрі Бекболат Молдабековтің айтуынша, қор тарапынан қаржыландыру әдетте шетел валютасында – АҚШ доллары немесе еуромен беріледі.

Қарыз алу шарттары салаға және нақты компанияның сипаттамаларына байланысты айқындалады, ал пайыздық мөлшерлемелер орта есеппен жылына 2,5-5% аралығында қалыптасады.

«Өзара іс-қимылға келсек, жекеменшік субъектілер негізінен тікелей жұмыс істейді, өйткені бұл келісім ратификацияланғаннан кейін электрондық платформа болады. Бұл платформа Қазақстан бизнесі үшін қолжетімді болады. Сондай-ақ OPEC қоры үшін өтімділік тұрғысынан бес жыл ішінде 400 млрд теңгеге дейінгі ең жоғары шек белгіленгенін атап өткім келеді», – деді ол.

Айта кетейік, OPEC қоры инфрақұрылымдық жобаларды, климаттың өзгеруіне қарсы шараларды, азық-түлік қауіпсіздігін, энергетикалық ауысымды, цифрландыру мен инновацияларды, сондай-ақ шағын және орта бизнесті дамыту жобаларын қаржыландырады.