Halyk Global Markets неге БЖЗҚ-мен жасалған шартты бұзуда

Halyk Global Markets компаниясы 2027 жылдан бастап зейнетақы активтерінің бір бөлігін басқарудан бас тарту туралы шешімінің себебін түсіндірді. Бұл туралы зейнетақы активтерін инвестициялық басқарушының Kapital.kz іскерлік ақпарат орталығы тілшісінің сұрауына берген жауабында айтып берді.

«Қазіргі уақытта зейнетақы активтерін жеке басқару сегментінде Halyk Bank-тің екі еншілес ұйымы – Halyk Global Markets және Halyk Finance жұмыс істейді. 2025 жылғы 31 желтоқсандағы жағдай бойынша Halyk Finance басқаруындағы зейнетақы активтерінің көлемі 50 млрд теңгеден асып, зейнетақы активтерін жеке басқару сегментінің шамамен 60%-ын құрады. 2025 жылдың соңында Қазақстан Республикасында зейнетақы активтерін сенімгерлік басқарумен айналысатын басқарушы компаниялардың қызметін реттейтін нормативтік-құқықтық актілерге енгізілген өзгерістерді, сондай-ақ екі еншілес ұйым арасындағы бәсекелестік факторын барынша азайту қажеттілігін ескере отырып, Halyk тобының зейнетақы активтерін басқару қызметін ірі компания – Halyk Finance базасында шоғырландыру туралы шешім қабылданды», – деп мәлім етті Halyk Global Markets сауалға берген жауабында.

2025 жылғы 30 желтоқсанда Halyk Global Markets өз бастамасымен зейнетақы активтерін сенімгерлік басқару туралы шартты бұзу жөнінде Бірыңғай жинақтаушы зейнетақы қорын, қаржы реттеушісін және кастодианды хабардар етті.

«Зейнетақы активтерін сенімгерлік басқару туралы шартты бұзу шартты бұзу туралы хабарлама жіберілген күннен бастап бір күнтізбелік жыл өткеннен кейін, 2027 жылдың басында жоспарланып отыр. Компания шарт бұзылғанға дейін зейнетақы активтерін басқаруды жалғастыра береді», – деп атап өтті Halyk Global Markets.

Айта кету керек, БЖЗҚ бұдан былай салымшылардан зейнетақы активтерін Halyk Global Markets басқаруына аудару туралы жаңа өтініштерді қабылдамайды.

Еске салайық, бес инвестициялық портфельді басқарушы – Alatau City Invest, Halyk Global Markets, BCC Invest, «Сентрас Секьюритиз», Halyk Finance басқаруындағы зейнетақы активтерінің жалпы көлемі 80,53 млрд теңгені құрайды.

2025 жылғы 1 желтоқсандағы жағдай бойынша Halyk Global Markets-тің сенімгерлік басқаруындағы зейнетақы активтері 7,74 млрд теңгені құрады. Портфель құрылымындағы негізгі инвестициялар мыналар: кері РЕПО (90 күнтізбелік күннен аспайтын) – 38,64%, ҚР Қаржы министрлігінің мемлекеттік бағалы қағаздары – 14,90%, шетел мемлекеттерінің орталық үкіметтері шығарған және мемлекеттік мәртебесі бар бағалы қағаздар – 8,65%, ҚР екінші деңгейлі банктерінің облигациялары – 7,41%, шетелдік эмитенттердің үлестік құралдары (ETF пайлары) – 6,12%, ҚР ұйымдарының корпоративтік облигациялары – 4,29%, ҚР квазимемлекеттік ұйымдарының облигациялары – 4,12%, шетелдік эмитенттердің корпоративтік облигациялары – 1,90%. Портфельдегі ұлттық валютадағы инвестициялар 70,43%-ды, доллардағы инвестициялар 29,57%-ды құрады. 2025 жылғы 1 желтоқсандағы жағдай бойынша соңғы 12 айда БЖЗҚ-ның зейнетақы активтерінің салымшылардың шоттарына бөлінген кірістілігі 10,50% болды.