Қазақстанда жеке кәсіпкерлерге салық режимін таңдау туралы алдын ала ескертіледі

Қазақстандық жеке кәсіпкерлер 2026 жылғы 1 қаңтардан бастап салық органдарынан салық режимін таңдау қажеттігі туралы хабарламалар ала бастайды. Бұл туралы қаржы вице-министрі Ержан Біржанов мәлімдеді, деп хабарлайды Kapital.kz іскерлік ақпарат орталығының тілшісі.

Бұл жеңілдетілген декларация негізінде жұмыс істейтін кәсіпкерлерге қатысты болмақ. Олар осы режимде қалу ниетін растауы немесе салық салудың жалпыға бірдей тәртібіне көшуі қажет. Тиісті хабарламаны 2026 жылғы 1 наурызға дейін тапсыру керек.

Вице-министрдің айтуынша, қазіргі таңда елде шамамен 1,9 млн жеке кәсіпкер жеңілдетілген декларация бойынша жұмыс істеп жатыр.

«Қазір 1,9 млн-ға жуық жеке кәсіпкер жеңілдетілген декларациямен жұмыс істейді. Олардың қаншасы жалпы режимге өтетіні әзірге белгісіз. Көпшілігі жеке тұлғалармен жұмыс істейтіндер үшін жеңілдіктер қарастырылғандықтан, жеңілдетілген режимде қала береді. Ал ірі бизнес өкілдерімен, жалпыға бірдей режимде жұмыс істейтіндерге қатысты сұрақ туындайды. Олар өтініш бермеуі мүмкін. Бірақ егер салық төлеуші өтініш беруді ұмытып кетсе, біз айыппұл салатын санкциялар қолданбаймыз», – деді Ержан Біржанов мәжіліс сыртында.

Оның айтуынша, барлық кәсіпкерлер үшін мерзімдерді өткізіп алу тәуекелін азайту мақсатында фискалдық сүйемелдеу қарастырылған.

«Яғни біз күн сайын 1,9 млн кәсіпкерді «бақылауда ұстаймыз». Бірінші күні қанша өтініш тапсырылғанын көреміз. Кейбірі ұмытып кетуі мүмкін. Сондықтан екі ай бойы оларға push-хабарламалар жіберіледі, телефон қоңыраулары шалынады, арнайы шақырулар жолданады», – деді вице-министр.

Кәсіпкерлер хабарламаны қашықтан — СӘИЖ жүйесіндегі салық төлеушінің жеке кабинеті арқылы, сондай-ақ ірі банктердің мобильді қосымшалары арқылы жолдай алады. Ержан Біржановтың айтуынша, бұл құрал қазірдің өзінде сынақтан өткен және 1 қаңтардан бастап қолжетімді болады.

«Қазір барлық қызметтер банк қосымшалары арқылы көрсетіледі. Сол сияқты сіз жеңілдетілген режимге өтуді қалайтыныңыз туралы өтінішті де бере аласыз. Ол автоматты түрде біздің жүйеде көрініс табады», – деп түсіндірді ол.

Еске сала кетейік, 2026 жылғы 1 қаңтардан бастап Қазақстанда арнайы салық режимдерімен жұмыс істейтін жеке кәсіпкерлерге қатысты жаңа ережелер күшіне енеді. Бұған дейін Мемлекеттік кірістер комитеті хабарлама тапсырылмаған жағдайда кәсіпкерлер автоматты түрде жалпыға бірдей салық режиміне көшірілетінін ескерткен болатын.

Сондай-ақ 2025 жылғы 18 шілдеде Қазақстан Президенті Қасым-Жомарт Тоқаев жаңа Салық кодексіне және «Қазақстан Республикасының кейбір заңнамалық актілеріне салық салу мәселелері бойынша өзгерістер мен толықтырулар енгізу туралы» заңға қол қойғанын еске саламыз. Құжатта қосылған құн салығының (ҚҚС) мөлшерлемесін арттыру және ҚҚС бойынша есепке қою шегін 10 000 айлық есептік көрсеткішке дейін төмендету қарастырылған.

Атап айтқанда, ҚҚС мөлшерлемесі 16%-ға дейін ұлғаяды. Дәрі-дәрмек пен медициналық қызметтер үшін ҚҚС-тың төмендетілген мөлшерлемесі 2026 жылдан бастап – 5%, 2027 жылдан бастап 10% белгіленген. Сондай-ақ тегін медициналық көмектің кепілдендірілген көлемі (ТМККК), міндетті әлеуметтік медициналық сақтандыру (МӘМС) аясындағы қызметтер, үкімет белгілейтін тізімге сәйкес орфандық және әлеуметтік маңызы бар ауруларды емдеу, баспа түріндегі кітап шығару қызметтері мен археологиялық жұмыстар ҚҚС-тан босатылады. Мерзімді баспа басылымдарын сату үшін ҚҚС-тың төмендетілген мөлшерлемесі 10% болып белгіленген. Жаңа Салық кодексі 2026 жылғы 1 қаңтардан бастап күшіне енеді.