Қазақстан темір жолы 2026 жылы IPO-ға шығуды жоспарлап отыр
Бүгінгі таңда компанияның несиелік портфелі 3,7 трлн теңгені құрайды
2026 жылы «Қазақстан темір жолы» АҚ-ның IPO-сын (акциялардың алғашқы жария орналастырылуын) өткізу жоспарланып отыр. Бұл туралы бүгін Үкімет отырысының қорытындысы бойынша өткен баспасөз конференциясы барысында ҚТЖ-ның қаржы жөніндегі басқарушы директоры Даир Кушеров мәлімдеді, деп хабарлайды Kapital.kz іскерлік ақпарат орталығының тілшісі.
«Біздің компания келесі жылы IPO-ға шығуды жоспарлап отыр. Бүгінгі таңда біздің несиелік портфеліміз 3,7 трлн теңгені құрайды, жыл басында ол 2,9 трлн теңге деңгейінде болған», – деді ол журналистердің сұрақтарына жауап бере отырып.
Еске сала кетейік, бұған дейін «Қазақстан темір жолы» «Самұрық-Қазына» қорымен бірлесіп, ҚТЖ акцияларының алғашқы жария орналастырылуына (IPO) дейінгі сатуға дайындық жұмыстарын жүргізіп жатқаны хабарланған болатын. Темір жол операторының акцияларының 20%-ға дейінгісін IPO-да сату жоспарланып отыр.
Жекешелендіру жөніндегі ұлттық офис квазимемлекеттік сектор субъектілерінің тізімін қалыптастырды, бәсекелес ортаға беруге ұсынылған 461 актив таңдалды. Сондай-ақ Жекешелендіру жөніндегі Ұлттық офис мемлекеттің меншікке иелік ету саясатын бекітуді ұсынып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
