ЕДБ-да 2,5 млрд доллар сомасына қазақстандық жобалар қаралып жатыр

2025 жылы Еуразиялық даму банкінің (ЕДБ) Қазақстанға салған инвестиция көлемі 1,5 млрд долларға жетті. Бұл туралы бүгін өткен баспасөз конференциясында Еуразиялық даму банкінің басқарма төрағасының орынбасары Руслан Дәленов мәлімдеді, деп хабарлайды Kapital.kz іскерлік ақпарат орталығының тілшісі.

«ЕДБ өз қызметінің 20 жылына жуық уақыт ішінде Қазақстан экономикасына 9 млрд доллар инвестициялады, бүгінде тағы 2,5 млрд доллар сомасына жобалар қарастырылып жатыр. Бұл Қазақстандағы әлеуетті жобалар түрінде, банктің республикадағы белсенді жұмысын көрсетеді. Сонымен қатар, 16 млн доллар техникалық көмек ретінде берілді», - деді ол.

ЕДБ жұмысы 2022-2026 жылдарға арналған бес жылдық стратегияға сәйкес жүріп жатыр, оның төрт жылы өтті. Осы аралықта ЕДБ ҚР жобаларына 5,1 млрд доллар инвестициялады. Олардың жартысына жуығы – өнеркәсіптік нысандар, үштен бірі – көлік және энергетикалық инфрақұрылым, ал қалғаны – қаржы секторы, АӨК және басқа да салалар.

«Инвестициялар динамикасының айтарлықтай өсуі байқалады, бұл жыл сайын бір миллиард доллардан асады, бұл ретте 2025 жылы инвестиция сомасы рекордтық 1,5 млрд долларға жетті. Бес жылдық стратегияның өткен төрт жылында көптеген жобалар іске асырылды. Мысал ретінде Қазақстандағы келесі нысандарды келтіруге болады: бұл Қарағанды ЖЭО-cын жаңғыртуын кеңейту. ЕДБ қатысуы 310 млн долларды құрады. Жоба электр энергиясын өндіруді 140 мегаватқа және жылу энергиясын сағатына 180 гигакалорияға арттыруға мүмкіндік береді», - деп түсіндірді Руслан Даленов.

Бұдан бөлек, ЖЭК нысандарын салу бойынша жобалары: Қазақстанның 6 облысында 10 күн және 3 жел станциясының жобасы іске асырылды. Банктің қатысуы жиынтық түрде 450 миллион долларды құрады.

«ҚазАвтоЖол» ұлттық компаниясы арқылы автожолдарды реконструкциялау. Бұған банктің қатысуы 200 млн долларды құрады. Бұл бірнеше жүз шақырымдық үш жол учаскесін құрайды. Алматыдағы әуежайды реконструкциялау басқа банктермен синдикатта жүзеге асырылды, сондай-ақ Түркістан қаласында әуежайды нөлден бастап салу толығымен ЕДБ тарапынан жүргізілді. Барлығы банктің бұл жобаларға қатысуы 170 млн долларды құрады. Бұл ЕДБ-ның Қазақстанның инфрақұрылымы мен экономикасын жаңғыртуға қатысуын сипаттайтын кейбір жобалары», - деп түсіндірді банк төрағасының орынбасары.

Жобаларды қаржыландырудан бөлек, ЕДБ екі қор желісі бойынша техникалық жәрдем үшін қаражат береді, олар: ЕБД техникалық жәрдемдесу қоры мен ЕДБ цифрлық бастамалар қоры.

«Бұл Astana hub-пен бірлесіп ЖИ платформасын іске қосу, Су ресурстары және ирригация министрлігінің су ресурстары ақпараттық жүйесін құру, Инвестиция комитетінің инвестплатформасын құру, БҰҰ-мен бірлесіп электрондық үкімет компоненттері, ЖЭО бойынша құжаттама дайындау және басқалар. Барлығы 16 млн доллар сомасына жәрдем көрсетілді», - деп толықтырды ол.

Еске сала кетейік, бұған дейін ЕДБ Қазақстандағы ирригация саласын жаңғыртуға 5,3 млн доллар көлемінде грант бөлетіні хабарланған болатын.