Желтоқсан айында Ұлттық банк Ұлттық қордан 500 млн долларға дейін валюта сатуды жоспарлап отыр

Қараша айының қорытындысы бойынша теңге 3,3%-ға нығайып, бір доллар 512,57 теңге деңгейіне жетті. Қазақстан қор биржасындағы орташа күндік сауда көлемі ай ішінде 271 млн доллардан 280 млн долларға дейін артты. Жалпы сауда көлемі 5,6 млрд долларды құрады, деп хабарлайды Ұлттық банктің баспасөз қызметі.

Қарашада Ұлттық қордан 600 млн доллар көлемінде валюта сатылды, бұл республикалық бюджетке трансферттер бөлуге мүмкіндік берді. Ұлттық қордан валюта сату үлесі жалпы сауда көлемінің 10,7% немесе тәулігіне шамамен 30 млн долларды құрады.

Үкіметтің алдын ала болжамды өтінімдері мен күтілетін фискалдық түсімдерді ескере отырып, желтоқсан айында республикалық бюджетке трансферттер бөлу үшін Ұлттық банктің Ұлттық қордан 400-500 млн доллар көлемінде валюта сатуы күтіледі.

Айнадай көшіру операциялары аясында қарашада 475 млрд теңге бейтараптандырылды. Желтоқсанда да осы мақсатта осы көлемге тең валюта сату жоспарланып отыр.

Ұлттық қор қаражатын пайдалану және айнадай көшіру механизмін іске асыру кезінде Ұлттық банк нарықтық бейтараптық қағидатын ұстанады. Бұл шетел валютасын тұрақты және біркелкі көлемде сатуды білдіреді.

Қараша айында Ұлттық банк валюталық интервенциялар жүргізген жоқ.

Квазимемлекеттік сектор субъектілерінің экспорттық валюталық түсімін міндетті түрде сатуы нормасы аясында өткен айда шамамен 390 млн доллар сатылды.

Бұған дейін жарияланған жоспарға сәйкес, Бірыңғай жинақтаушы зейнетақы қорының (БЖЗҚ) валюталық активтерінің үлесі 40%-дан жоғары болуына байланысты, Ұлттық банк қарашада зейнетақы активтерінің инвестициялық портфеліне валюта сатып алмаған. Желтоқсанда да валюта сатып алу жоспарланбаған.

Транспаренттік қағидаты аясында Ұлттық банк валюталық нарықта жүргізілетін операциялар туралы толық ақпаратты ашуды жалғастырады. Алдағы қысқа мерзімді уақыт ішінде теңге динамикасы нарық қатысушыларының күтулеріне, тоқсандық салық төлемдеріне, әлемдік нарықтағы жағдайға және геосаяси ахуалдың өзгеруіне байланысты болады. Ұлттық банк теңгенің икемді айырбас бағамы режимін ұстануды жалғастырады, бұл теңгерімсіздіктердің жиналуына жол бермей, алтын-валюта резервтерін сақтауға мүмкіндік бермек.

Еске салайық, биылғы жылдың үшінші тоқсанында Ұлттық қордың валюталық активтері 62,7 млрд долларды құрады.

2026 жылға арналған Қазақстанның республикалық бюджеты Ұлттық қордан нысаналы трансферттерсіз қалыптастырылған. Ал кепілдендірілген трансферт 2,8 трлн теңге мөлшерінде белгіленді.