Sensata Group AIX-ке 100 млрд теңгелік облигациялық бағдарламаны шығарды

Astana International Exchange (AIX) биржасында Sensata Group 100 млрд теңгеге облигациялық бағдарламаны тіркеуден өткізіп, 10,01 млрд теңгеге алғашқы траншты шығарды, деп хабарлайды Kapital.kz іскерлік ақпарат орталығының тілшісі AIX баспасөз қызметіне сілтеме жасап.

«Алғашқы шығарылымды орналастыру – әрбір эмитент үшін маңызды кезең. Sensata Group компаниясы үшін бұл тек жария капитал нарығына шығу емес, сондай-ақ компанияның жетілгендігін және одан әрі өсуге дайын екенін растайтын стратегиялық қадам. AIX алаңында облигациялардың айналымы компания үшін оның ұзақмерзімді жобаларын қаржыландырудың сенімді құралы болатынына сенімдіміз», – деді AIX-тің нарықтар және өнімдер жөніндегі басқарушы директоры Біржан Астаев.

Мәміленің қаржылық кеңесшісі AIFC Green Finance Centre Ltd. компаниясы болды.

Sensata Group нарықта 2012 жылдан бері жұмыс істеп келеді және осы уақыт ішінде елдегі ең ірі девелоперлердің біріне айналды. Оның қоржынында Астана, Алматы және Германиядағы 40-тан астам жоба, пайдалануға берілген 1,7 млн шаршы метрден астам жылжымайтын мүлік және 8 000-нан астам сатылған пәтер бар.

Бұған дейін хабарланғандай, Halyk Bank акцияларының 56,39%-ына иелік ететін «АЛМЭКС» холдингі банктегі үлесін төмендетіп, инвесторларға 4% үлесін сатуды жоспарлап отыр. ҚР Қаржы министрлігі халықаралық капитал нарығында 1,5 млрд доллар көлемінде айналыс мерзімі 5 жыл болатын тәуелсіз еурооблигациялар шығарды. Jiaxin International Resources Investment Limited компаниясының акциялары AIX-тегі листингке және саудаға жіберілді. Компания Алматы облысындағы әлемдегі төртінші ірі Бұғыты вольфрам кен орнын игерумен айналысады. AIX-те Fonte Bitcoin Exchange Traded Fund OEIC PLC (BETF) – Қазақстандағы және Орталық Азиядағы алғашқы споттық биткоин ETF саудасы басталды. 2025 жылдың тамызында AIX биржасында Tolqyn SPC Ltd. компаниясының биржалық ноталары (ETN) саудалана бастады.