Инвесторлармен ынтымақтастық жаңа кезеңге шықты
Олжас Бектенов Инвестициялық ахуалды жақсарту жөніндегі кеңестің отырысын өткізді
Премьер-министр Олжас Бектеновтің төрағалығымен өткен Инвестициялық ахуалды жақсарту жөніндегі кеңестің отырысында Қазақстан Үкіметі мен халықаралық бизнес қауымдастық арасындағы өзара іс-қимылды нығайту мәселелері талқыланды. Сонымен қатар цифрландыру және жасанды интеллект салаларындағы инвестициялық мүмкіндіктер қаралды, деп хабарлайды Үкіметтің баспасөз қызметі.
Отырыста Қазақстан Республикасының жаңа Ата заңының күшіне енуіне және соған байланысты инвестициялық ынтымақтастықты кеңейтуге ашылған жаңа мүмкіндіктерге ерекше назар аударылды.
«Бүгінгі кездесуіміз еліміз үшін тарихи кезеңде өтіп отыр. Президент Қасым-Жомарт Кемелұлы Тоқаевтың басшылығымен Қазақстан өзінің дамуының мүлде жаңа кезеңіне қадам басты. Жалпыхалықтық референдумда қабылданған Ата заң Әділетті әрі Прогрессивті Қазақстанды құруға бағытталған ауқымды реформаларды кезең-кезеңімен жалғастырудың берік негізіне айналды. Бүгінде бүкіл құқықтық жүйені жаңғырту жұмыстары жүйелі түрде жалғасып жатыр. Бұл өзгерістер экономиканың тұрақты әрі дәйекті дамуын қамтамасыз етуге де бағытталған», – деді Олжас Бектенов.
Кеңеске қатысушыларға жаңа Ата заң күшіне енгеннен кейін, 1 шілдеден бастап елімізде жаңа мемлекеттік-саяси модельді қалыптастыру басталғаны жөнінде ақпарат берілді. Атап айтқанда, жаңа заң шығарушы орган – Мәжіліс сайлауы тағайындалды, сондай-ақ жаңа жоғары консультативтік орган – Қазақстан Халық кеңесінің хатшылығы құрылды. Сонымен қатар Конституциялық сот Президенттің, Конституциялық сот төрағасы мен судьяларының, Жоғарғы сот төрағасының және Бас прокурордың өкілеттік мерзімінің бір рет тағайындалуына қатысты конституциялық норманы қолдану тәртібі жөнінде түсіндірме берді.
«Конституциялық сот өз шешімімен бұл норманың тек жаңа Ата заң күшіне енгеннен кейін, яғни биылғы 1 шілдеден кейін тиісті лауазымдарға тағайындалған немесе сайланған тұлғаларға ғана қолданылатынын нақты әрі бірмәнді түсіндірді. Құқықтық айқындықтың енгізілуі ішкі және сыртқы аудитория үшін өзекті болған бірқатар мәселені күн тәртібінен алып тастайды. Бұл саяси-құқықтық жүйенің тұрақтылығы мен болжамдылығына ерекше мән беретін инвесторлар үшін де оң белгі деп санаймын», – деп атап өтті премьер-министр.
Үкімет басшысы Президент бастамашылық еткен реформалардың қоғам тарапынан кең қолдау тауып отырғанын да атап өтті. Соңғы әлеуметтік сауалнамалардың нәтижесіне сәйкес, ел азаматтарының 87%-дан астамы Қазақстанның дұрыс бағытта дамып келе жатқанына сенімді. Бұл халықтың жүзеге асырылып жатқан ауқымды өзгерістердің нақты нәтижесін көріп отырғанын көрсетеді.
«Саяси бағыттың қоғам тарапынан қолдау табуы – Президент реформаларын табысты іске асырудың негізгі факторларының бірі. Осылайша, жаңа конституциялық модель мен тұрақты реформалар бағыты экономикамызды одан әрі жаңғыртуға, халықаралық әріптестікті кеңейтуге және Қазақстанның инвестициялық тартымдылығын арттыруға берік негіз болып отыр. Құрметті әріптестер, жаңа Ата заң аясында сіздермен ынтымақтастығымыз да жаңа даму кезеңіне қадам басты. Елімізде жүзеге асырылып жатқан саяси және экономикалық өзгерістер ұзақмерзімді әрі өзара тиімді серіктестікті дамытуға қуатты серпін беретініне сенімдімін», – деді Олжас Бектенов кеңеске қатысушыларға.
Отырыста цифрландыруды дамыту және жасанды интеллектіні енгізу мәселелері де қаралды. Бүгінде бұл бағыттар инвестициялар үшін жаһандық бәсекеде елдердің бәсекеге қабілеттілігін айқындайтын маңызды факторлардың бірі саналады.
Қазақстанда 2026 жыл Президенттің шешімімен Цифрландыру және жасанды интеллект жылы болып жарияланды. Осыған байланысты жаңа Ата заңда азаматтардың цифрлық құқықтары ресми түрде бекітіліп, 2029 жылға дейінгі Digital Qazaqstan жалпыұлттық стратегиясы қабылданды. Сонымен қатар Цифрлық кодекс, «Жасанды интеллект туралы» және «Киберқауіпсіздік туралы» заңдар күшіне енді.
Сонымен қатар деректердің трансшекаралық сенімді алмасуын қамтамасыз ететін заманауи реттеу тетіктері енгізілуде. Олардың қатарында Cloud First Policy және Data Embassy бастамалары бар. «Деректерді өңдеу орталықтарының алқабы» (Data Center Valley) флагмандық жобасы аясында Қазақстан Firebird AI компаниясымен жасанды интеллект инфрақұрылымын дамытуға бағытталған 10 млрд доллар көлеміндегі келісімге қол қойды. Жалпы осы бағыттағы бизнес мәселелерін жедел шешу үшін Үкімет жанынан Цифрлық штаб жұмыс істейді.
«Қазақстан Президенті Қасым-Жомарт Кемелұлы Тоқаев елімізді толыққанды цифрлық мемлекетке айналдыру міндетін қойды. Біз үшін цифрлық трансформация мен жасанды интеллектіні дамыту – тұрақты экономикалық өсудің, мемлекеттік басқару тиімділігін арттырудың және азаматтардың өмір сүру сапасын жақсартудың маңызды тетігі. Еліміздің іскерлік ахуалын нығайтуға шетелдік серіктестердің қосқан үлесін жоғары бағалаймыз. Үкімет барлық салада өзара тиімді нәтижелерге қол жеткізу үшін инвесторлармен сындарлы диалог жүргізуге әрқашан дайын», – деді премьер-министр.
Кеңес барысында Қазақстандағы Америкалық сауда палатасының атқарушы директоры Джефф Эрлих, АҚШ-тың Қазақстандағы елшісі Джули Стаффт және бизнес қауымдастық өкілдері сөз сөйледі.
Джули Стаффт Қазақстан мен АҚШ арасындағы сауда-экономикалық және инвестициялық ынтымақтастықтың жоғары деңгейін, сондай-ақ цифрлық реттеу, бұлтты технологияларды дамыту, дербес деректерді өңдеу және трансшекаралық деректер алмасу мәселелері бойынша Үкімет пен бизнес қауымдастығы арасындағы ашық диалогтың маңыздылығын атап өтті.
Халықаралық бизнес қауымдастығы атынан ұсыныстарды Baker McKenzie компаниясының серіктесі әрі AmCham жанындағы Цифрландыру комитеті кеңесінің мүшесі Андрей Ёрш, Apple компаниясының Орталық Азия, Армения және Моңғолия бойынша мемлекеттік саясат және мемлекеттік органдармен өзара іс-қимыл бөлімінің басшысы Әділхан Қопабаев, Siemens Kazakhstan компаниясының бас директоры Дияс Асанов және Honeywell компаниясының Орталық Азия елдеріндегі президенті Артур Нигматянов жеткізді.
Компания өкілдері Цифрлық кодексті практикалық тұрғыдан іске асыру, онлайн-платформаларды реттеу, қоғамдық бұлтты шешімдерді дамыту, дербес деректерді қорғау, киберқауіпсіздік, жасанды интеллектіні қолдану, өнеркәсіптік процестерді цифрландыру және реттеушілік тиімділікті арттыру мәселелерін көтерді.
Бұл бағытта атқарылып жатқан жұмыстарға Жасанды интеллект және цифрлық даму вице-министрі Ғиззат Байтұрсынов пен Мәдениет және ақпарат бірінші вице-министрі Қанат Ысқақов түсініктеме берді.
Кеңес қорытындысы бойынша Олжас Бектенов Қазақстан ұзақмерзімді инвестициялар үшін ашық әрі болжамды мемлекет болып қала беретінін атап өтті. Үкімет ел экономикасын цифрлық трансформациялау жұмыстарын тереңдетуді жалғастырып, цифрлық реттеуді жетілдіру, пайдаланушылардың қауіпсіздігін қамтамасыз ету, инновациялық инфрақұрылымды дамыту және инвесторлар үшін болжамды жағдай қалыптастыру мәселелері бойынша бизнес қауымдастығымен өзара іс-қимылды жалғастыруға дайын екенін мәлімдеді.
Премьер-министр жауапты мемлекеттік органдарға халықаралық бизнес өкілдері көтерген ұсыныстар мен ұсынымдарды жан-жақты зерделеп, оларды алдағы жұмыста ескеруді тапсырды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
