• Басты бет
• Экономика
• Әлеуметтік маңызы бар азық-түлік өндірушілеріне электр энергиясының тарифін 20%-ға дейін төмендету ұсынылды

Әлеуметтік маңызы бар азық-түлік өндірушілеріне электр энергиясының тарифін 20%-ға дейін төмендету ұсынылды

Жеңілдік тауар бағасын тұрақтандыру туралы меморандум жасалған жағдайда беріледі

Қазақстанда әлеуметтік маңызы бар азық-түлік өнімдерін өндірушілер үшін электр энергиясының құнын төмендету жоспарланып отыр. Ұлттық экономика министрлігі баға белгілеу қағидаларына өзгерістер енгізу туралы бұйрық жобасын әзірледі. Жеңілдетілген тариф кәсіпкерлердің шығынын азайтып, әлеуметтік маңызы бар азық-түлік бағасының тұрақтылығын сақтауға мүмкіндік береді деп күтілуде, деп хабарлайды Kapital.kz іскерлік ақпарат орталығы Табиғи монополияларды реттеу комитетінің баспасөз қызметіне сілтеме жасап.

«Құжатта өнімнің өзіндік құнының негізгі құрамдас бөліктерінің бірі саналатын электр энергиясының құнын төмендету арқылы әлеуметтік маңызы бар азық-түлік өнімдерін отандық өндірушілерді қолдаудың жаңа тетігі көзделген. Жобаға сәйкес, әлеуметтік маңызы бар азық-түлік өнімдерін өндірушілерге электр энергиясын қолданыстағы босату тарифінен 20%-ға дейін төмен тарифпен сатып алу мүмкіндігін беру ұсынылады. Бұл шара орталық мемлекеттік органмен немесе жергілікті атқарушы органмен тауар бағасын тұрақтандыру туралы меморандум жасалған жағдайда қолданылады», – делінген комитет хабарламасында.

Жеңілдетілген тариф тек әлеуметтік маңызы бар азық-түлік өнімдерін өндіруге тікелей пайдаланылатын электр энергиясының көлеміне ғана қолданылады.

«Қазақстан Республикасы Ұлттық экономика министрінің 2017 жылғы 1 ақпандағы №36 «Қоғамдық маңызы бар нарықтарда баға белгілеу қағидаларын бекіту туралы» бұйрығына өзгеріс енгізу туралы» бұйрық жобасы «Ашық НҚА» порталында жарияланды.

Еске салайық, 2026 жылдың басынан бері 2 мыңнан астам электрондық шот-фактураны талдау нәтижесінде әлеуметтік маңызы бар азық-түлік тауарларына сауда үстемесін қолдану бойынша заңнаманы бұзудың 631 дерегі анықталды. Сауда және интеграция министрлігі Қазақстанда әлеуметтік маңызы бар азық-түлік бағасының өсу қарқыны төрт есеге төмендегенін мәлімдеді. Ал Алматыда әлеуметтік нанның бағасы 2027 жылға дейін бекітілді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз