Қазақстанда республикалық маңызы бар үш автожол учаскесі ақылы болады
10-11 шілдеден бастап Балқаш, Құрты және Өскемен бағыттарында жол жүру ақысы енгізіледі
Қазақстанда республикалық маңызы бар бірқатар автомобиль жолдарында ақылы жол жүру жүйесі енгізіледі. Жаңа тәртіп кезең-кезеңімен күшіне енеді: 10 шілдеден бастап Қарағанды – Балқаш – Бурылбайтал және Бурылбайтал – Құрты бағыттарында, ал 11 шілдеден бастап Талдықорған – Өскемен автожолында ақы алына бастайды. Төлем көлік құралының мемлекеттік тіркеу нөмірі бойынша автоматты түрде есептеледі. Ал ақылы жолға жақын орналасқан аудандардың тұрғындары абоненттік төлем рәсімдей алады, деп хабарлайды Kapital.kz іскерлік ақпарат орталығы «ҚазАвтоЖол» ұлттық компаниясының баспасөз қызметіне сілтеме жасап.
1. Қарағанды – Балқаш – Бурылбайтал
Аталған учаскеде ақылы жол жүру жүйесі 2026 жылғы 10 шілдеден бастап енгізіледі. Ақылы жолдың жалпы ұзындығы – 645,64 шақырым. Оның ішінде 91 шақырымы бұрыннан ақылы болса, 554,64 шақырымы жаңадан енгізіледі. Учаске 247+700 шақырымнан басталып, 2151+000 шақырымда аяқталады. Бұл бағытта рұқсат етілген ең жоғары жылдамдық – сағатына 140 шақырым.
Абоненттік төлемді Бұқар жырау, Абай, Шет, Ақтоғай, Мойынқұм, Жамбыл аудандарында, сондай-ақ Балқаш және Приозерск қалаларында тіркелген көлік иелері рәсімдей алады.
2. Бурылбайтал – Құрты
Бұл учаскеде де ақылы жол жүру тәртібі 2026 жылғы 10 шілдеден бастап қолданысқа енгізіледі. Ақылы жолдың ұзындығы – 80 шақырым. Учаске 1041+000 шақырымнан басталып, 1121+000 шақырымда аяқталады. Ең жоғары жылдамдық – сағатына 140 шақырым.
Абоненттік төлемді Жамбыл және Іле аудандарында тіркелген көлік құралдарының иелері рәсімдей алады.
3. Талдықорған – Өскемен
Бұл бағытта ақылы жол жүйесі 2026 жылғы 11 шілдеден бастап енгізіледі. Ақылы учаскенің жалпы ұзындығы – 772,955 шақырым. Оның 32,4 шақырымы I санаттағы, ал 740,55 шақырымы II санаттағы жолға жатады. Учаске 287+000 шақырымнан басталып, 1073+000 шақырымда аяқталады.
Жылдамдық режимі жол санатына қарай белгіленген: I-б санатындағы учаскеде – сағатына 110 шақырымнан, II санаттағы жолда – сағатына 100 шақырымнан аспауы тиіс.
Абоненттік төлемді Ескелді, Ақсу, Сарқан, Алакөл, Үржар, Аягөз, Жарма және Ұлан аудандарында тіркелген көлік иелері рәсімдей алады.
Абоненттік төлем ақылы жол учаскесіне жақын орналасқан елді мекендерде тіркелген жергілікті көлік құралдарына арналған. Ол бір айға немесе бір жылға рәсімделеді және көлік құралының түрі мен жүк көтергіштігіне қарай белгіленеді.
Еске салайық, 2026 жылдың басынан бері Қазақстанның ақылы жолдарында мемлекеттік тіркеу нөмірлерін жасыру немесе жалған нөмір пайдалану бойынша екі мыңға жуық дерек анықталған. Сонымен қатар Мәжілісте жүргізушілерге қойылатын талаптарды күшейту мәселесі қаралып жатыр. Депутаттар жалған мемлекеттік нөмірлерді пайдалануды қылмыстық жауапкершілікке жатқызуды және цифрлық жүйелер арқылы жүргізушілердің денсаулық жағдайын бақылауды күшейтуді ұсынып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
